محض ایک ہفتے میں اس ویڈیو پر نہ صرف پاکستان بلکہ بھارت سمیت دیگر ممالک میں بھی مزاحیہ ویڈیوز و میمز بنائی گئیں۔

’ یہ ہماری کار ہے، اور یہ ہم ہیں اور یہ ہماری پاوری (پارٹی) ہو رہی ہے' جیسے مختصر الفاظ پر مبنی ویڈیو 6 فروری کو پشاور و اسلام آباد کی یوٹیوبر و ولاگر دنانیر (dananeerr) نے اپنے سوشل میڈیا اکاؤنٹس پر شیئر کی تھی۔

انہوں نے ویڈیو کے کیپشن میں لکھا تھا کہ 'جب برگرز شمالی علاقہ جات کی سیر کو جائیں تو وہ کہتے ہیں یہ ہماری پاوری ہو رہی ہے'۔

ولاگر کی جانب سے انگریزی لہجے میں اردو بولنے کی وجہ سے ویڈیو کو بہت پسند کیا گیا اور اس پر شوبز شخصیات سے لے کر سیاستدانوں، نوجوان طلبہ، عام افراد اور پیشہ ورانہ ذمہ داریاں ادا کرنے والے افراد نے بھی ویڈیوز بنائیں۔

مزید پڑھیں: پانچ سیکنڈ کی ویڈیو سے مشہور ہونے والی ’پاوری‘ گرل کون ہیں؟

'پاوری' ویڈیو مقبول ہونے کے بعد ولاگر نے اپنے سوشل میڈیا اکاؤنٹس پر اپنی ویڈیو کے ریپ ورژن کی نئی ویڈیو بھی جاری کی۔

انہوں نے ویڈیو کے کیپشن میں لکھا تھا کہ 'پاوری تو اب شروع ہوگی، آپ اندازہ لگائیں کہ کیا جلد آرہا ہے؟'

اور اب اپنی یہ ویڈیو کے وائرل ہونے سے متعلق دنانیر کہتی ہیں کہ انہیں معلوم ہے کہ 'پاوری' نہیں پارٹی ہوتا ہے۔

اپنی ویڈیو کے حوالے سے بی بی سی کی اردو سروس سے بات چیت کرتے ہوئے ولاگر دنانیر کا کہنا تھا کہ یہ ویڈیو بنانا ان کا طے شدہ منصوبہ نہیں تھا۔

انہوں نے بتایا کہ وہ اپنے دوستوں کے ساتھ نتھیا گلی کی سیر کو گئی تھیں اور کھانا کھانے کے لیے رکی تھیں تو بس اچانک ہی انہوں نے موبائل فون نکال کر ویڈیو بنائی اور اپلوڈ کر دی۔

ویڈیو جیسے انداز میں بات کرنے سے متعلق سوال پر دنانیر نے کہا یہ میرا انداز نہیں ہے، میں ایسے بات نہیں کرتی بس صرف ویڈیو بنانے کے لیے مزاحیہ انداز اختیار کیا تھا۔

ولاگر دنانیر کا کہنا تھا کہ ’مجھے 'پارٹی' کہنا آتا ہے اور معلوم ہے کہ 'پاوری' نہیں پارٹی ہوتا ہے'۔

وائرل ہونے والی ویڈیو سے متعلق انہوں نے مزید کہا کہ میں نے تو صرف اپنے انسٹاگرام فالوورز کو ہنسانے کے لیے ایسی ویڈیو بنائی تھی۔

ایک سوال کے جواب میں دنانیر کا کہنا تھا کہ ' جب میں ویڈیو اپلوڈ کررہی تھی تو اس وقت میرا وائرل ہونے کا کوئی ارادہ نہیں تھا'۔

انہوں نے مزید کہا کہ ویڈیو بنانے کا مقصد سب کو ہنسانا تھا اور وہ اس سے زیادہ ہی کرنے میں کامیاب ہوئیں۔

اپنی ویڈیو پر بننے والی میمز سے متعلق دنانیر کا کہنا تھا کہ میرا نہیں خیال کہ کوئی ایک ویڈیو میری پسندیدہ ہے۔

ولاگر کا مزید کہنا تھا کہ جب میمز کی بات آئے تو پاکستانی عوام بہت اعلیٰ میمز بناتے ہیں اور سب ہی میمز دل کو چھولینے والی ہیں کہ میں کسی ایک کو منتخب نہیں کرسکتی۔

یہ بھی پڑھیں: وائرل ویڈیو ’ہماری پاوری ہو رہی‘ کے دیس پردیس میں چرچے

'ہماری پاوری ہورہی ہے' کی ویڈیو کے بعد دنانیر کے فالوورز کی تعداد میں اضافہ ہوا ہے اور وہ مقبول بھی ہوئی ہیں۔

اس حوالے سے ولاگر کا کہنا تھا کہ اس ویڈیو کے بعد اب میرے پاس ایک بڑا خاندان ہے جس پر میں اپنے فالوورز کی بہت شکر گزار ہوں۔

ویڈیو وائرل ہونے پر اہلخانہ کے ردعمل سے متعلق دنانیر نے بتایا کہ میرے گھر اور دوستوں سب کو پتا ہے کہ میں مزاحیہ باتیں کرتی ہوں۔

انہوں نے مزید کہا کہ 'میں عجیب و غریب تبصرے اور احمقانہ مذاق کرتی رہتی ہوں اور اپنے قریبی افراد کے ساتھ میں بس ایسی ہی ہوں۔'

دنانیر کی ویڈیو پر بھارتی اداکار و موسیقار یش راج مکھاٹے نے دھن بھی ترتیب دی ہے جس پر انہوں نے کہا کہ جہاں دنیا بھر میں اتنی تقسیم ہے، ایسے وقت میں سرحد پار پیار بانٹنے سے بہتر کیا ہو سکتا ہے؟

ولاگر کا کہنا تھا کہ مجھے خوشی ہے کہ میری ویڈیو کی وجہ سے اب ہم اور ہمارے ہمسائے مل کر ’پارٹی‘ کر رہے ہیں۔