تھرپارکر میں مٹھی، اسلام کوٹ، ننگرپارکر، چھاچھرو، چیلہار، ڈاھلی، ڈیپلو، کلوئی، کانٹیو، کاسبو سمیت دیگر شہروں میں ہولی کا رنگین تہوار منایا گیا۔

ضلع میں ہولی کی مرکزی تقریب کا انعقاد مٹھی میں سونارا برادری کی جانب کیا گیا جہاں مختلف مذاہب سے تعلق رکھنے والے سیکڑوں افراد نے شرکت کی۔

ہولی کی تقریب میں پاکستان پیپلز پارٹی (پی پی پی) کے رکن صوبائی اسمبلی ارباب لطف اللہ نے خصوصی شرکت کی اور خطاب کرتے کہا کہ آج کے دور میں تھر کے اس مثالی بھائی چارے اور امن کو بچانے کی اشد ضرورت ہے۔

انہوں نے کہا کہ تھر کے امن اور بھائی چارے کے لیے نوجوانوں کا اہم کردار ہے اور ہم تھر کی ان روایات کو برقرار رکھنے کے لیے دن رات کوشاں رہیں گے، تھرپارکر مذہبی ہم آہنگی کے لیے پوری دنیا میں ایک ماڈل ہے۔

سیاسی اور سماجی رہنماؤں نے خطاب میں کہا کے ہم ہولی کے تہوار پر رواداری، امن اور محبت کے پیغام کو عام کرکے تھر کی صدیوں پرانی روایت بچا کر اپنے ملک کے دشمنوں کو یہی پیغام دے رہے ہیں کہ ہم سب ایک پرامن پاکستانی قوم ہیں۔

ہولی کی تقریب کے شرکا نے ایک دوسرے پر رنگوں کی بارش کی، مٹھائی بانٹ کر ہولی کی مبارک دی، تقریب میں محفل موسیقی کا بھی اہتمام کیا گیا تھا جہاں مقامی سطح پر مقبول گلوکاروں نے اپنے فن کا مظاہرہ کیا۔