ڈان نیوز ٹی وی کے مطابق سلطانہ ظفر کے خاندانی ذرائع نے بتایا کہ اداکارہ کا انتقال امریکا میں گزشتہ شب (15 جولائی کو) ہوا۔

تاہم سلطانہ ظفر کے خاندانی ذرائع کی جانب سے ان کے انتقال کی وجہ بیان نہیں کی گئی۔

مزید پڑھیں: پاکستانی ڈراموں کی ’ملکہ‘ حسینہ معین مداحوں سے بچھڑ گئیں

لیجنڈری اداکارہ امریکی ریاست ٹیکساس کے شہر ڈیلاس میں مقیم تھیں اور 'ارمیل اسٹوڈیو' کے نام سے ایک امریکا میں ایک بوتیک چلارہی تھیں۔

انہوں نے سوگواران میں 2 بیٹے چھوڑے ہیں جو امریکا ہی میں مقیم ہیں۔

دوسری جانب پاکستان نیشنل کونسل آف آرٹس (پی این سی اے) کی جانب سے سلطانہ ظفر کے انتقال کی تصدیق کی گئی۔

فیس بک اور ٹوئٹر پر شیئر کی گئی پوسٹس میں پی این سی اے نے کہا کہ ماضی کی مقبول اداکارہ سلطانہ ظفر امریکا میں انتقال کرگئیں۔

یہ بھی پڑھیں: ماضی کی مقبول اداکارہ فردوس بیگم انتقال کر گئیں

ٹوئٹ میں مزید کہا گیا کہ وہ پاکستانی ڈراما انڈسٹری کا ایک بڑا نام تھیں، سلطانہ ظفر ’تنہائیاں‘ اور ’ان کہی’ میں اداکاری کے لیے جانی جاتی ہیں۔

سلطانہ ظفر اپنے منفرد حیدرآباد لب و لہجے کی وجہ سے جانی جاتی تھیں۔

انہوں نے ’تنہائیاں’، ’ان کہی’، ’آخری چٹان’ سمیت پاکستان ٹیلی ویژن (پی ٹی وی) کے متعدد ڈراموں میں اداکاری کی تاہم انہیں ’تنہائیاں‘ میں ادا کیے جانے والے مختصر کردار سے بہت زیادہ مقبولیت حاصل ہوئی تھی۔