ماضی میں بھی اشنا شاہ کے انداز، بولڈ تصاویر اور ویڈیوز کی وجہ سے ان پر تنقید کی جاتی رہی ہے لیکن حال ہی میں لوگوں نے ان کی تصاویر پر نامناسب کمنٹس بھی کیے۔

اشنا شاہ نے حال ہی میں انسٹاگرام پر اپنے آنے والے ایک گانے ’کنگنا‘ کی شوٹنگ کے دوران کھچوائی گئی تصاویر شیئر کیں تو لوگ پر ان کے انداز پر برہم دکھائی دیے۔

اداکارہ کی جانب سے شیئر کی گئی تصاویر میں انہیں بولڈ عروسی لباس کی طرز کے کپڑوں میں دیکھا جا سکتا ہے۔

اشنا شاہ کی جانب سے شیئر کی گئی تصاویر میں گلوکار مناج مسک کے ساتھ بھی دیکھا جا سکتا ہے۔

تصاویر کو شیئر کرتے ہوئے اشنا شاہ نے واضح کیا کہ انہیں شوٹنگ کے دوران بنایا گیا۔

یہ بھی پڑھیں: اشنا شاہ کو ڈیلیوری بوائے کے ساتھ نامناسب رویے پر تنقید کا سامنا

تاہم اداکارہ کی تصاویر پر لوگوں نے برہمی کا اظہار کرتے ہوئے اشنا شاہ پر فحاشی پھیلانے کا الزام بھی عائد کیا جب کہ انہیں مسلمان ملک کی خاتون ہونے کے باوجود بولڈ لباس پہننے کے طعنے بھی دیے۔

کئی افراد نے گلوکار مناج مسک کے بجائے اشنا شاہ کو تنقید کا نشانہ بنایا اور ان کے لباس کو بھارتی و مغربی ثقافت کا عکس قرار دیا۔

بعض صارفین نے اشنا شاہ کی تصاویر پر نامناسب کمنٹس کرتے ہوئے ان کے خلاف قدرے سخت زبان بھی استعمال کی جب کہ کچھ لوگوں کا کہنا تھا کہ شوبز سے وابستہ خواتین ایسا ہی مغربی طرز کا لباس پہننے کو ترجیح دیتی ہیں۔

کچھ لوگوں نے یہ تک کہا کہ اب ایسی خواتین کو ہدایت کرنا فضول ہے، کیوں کہ شوبز میں کام کرتے کرتے بولڈ لباس پہننا اب ان کی عادت بن چکا ہے اور ایسے لوگوں کو وزیر اعظم کی بات سمجھ نہیں آئی تو عام لوگوں کی بات کیسے سمجھیں گے؟

کچھ مداحوں نے اشنا شاہ کی تعریف کرتے ہوئے انہیں احسن طریقے سے سمجھایا کہ انہیں اس طرح کا بولڈ لباس نہیں پہننا چاہیے۔