’ایک ہے نگار‘ میں ماہرہ خان اسکرین پر پاک فوج کی پہلی خاتون لیفٹیننٹ جنرل نگار جوہر کے روپ میں دکھائی دیں گی۔

مذکورہ ٹیلی فلم کے ٹیزرز رواں برس اگست میں ریلیز کیے گئے تھے اور خیال کیا جا رہا تھا کہ ممکنہ طور پر ٹیلی فلم کو ستمبر میں ریلیز کیا جائے گا۔

تاہم اب فلم کی ٹیم نے اس کی تاریخ کا اعلان کرتے ہوئے اسے رواں ماہ 23 اکتوبر کو ریلیز کرنے کا اعلان کردیا۔

یہ بھی پڑھیں: ماہرہ خان اسکرین پر پہلی خاتون لیفٹیننٹ جنرل بننے کو تیار

ماہرہ خان اور ٹیلی فلم کی پروڈیوسر نینا کاشف سمیت اسے نشر کرنے والے ٹی وی چینل کی جانب سے سوشل میڈیا پر کی گئی پوسٹس میں تصدیق کی گئی کہ ’ایک ہے نگار‘ کو رواں ماہ کے اختتام تک نشر کیا جائے گا۔

پوسٹس میں بتایا گیا کہ ٹیلی فلم کو 23 اکتوبر کی شب رات 8 بجے اے آر وائے ڈیجیٹل پر نشر کیا جائے گا۔

’ایک ہے نگار‘ کی کہانی معروف لکھاری عمیرہ احمد نے لکھی ہے جب کہ اس کی ہدایات عدنان سرور نے دی ہیں۔

مزید پڑھیں: پاک فوج کی پہلی خاتون لیفٹیننٹ جنرل کی زندگی پر بننے والی ٹیلی فلم کا ٹیزر ریلیز

ٹیلی فلم میں جہاں ماہرہ خان فوجی خاتون کے روپ میں دکھائی دیں گی، وہیں وہ اس کی شریک پروڈیوسر بھی ہیں۔

‘ایک ہے نگار‘ کو نینا کاشف اور ماہرہ خان نے مشترکہ طور پر پروڈیوس کیا ہے اور اسے ’سول فرائے‘ پروڈکشن ہاؤس کے بینر تلے ریلیز کیا جائے گا۔

ٹیلی فلم میں ماہرہ خان کے شوہر کا کردار بلال اشرف کرتے دکھائی دیں گے۔

’ایک ہے نگار‘ کے جاری کیے گئے ٹیزرز میں ماہرہ خان کو بطور لیفٹیننٹ جنرل نگار دکھایا گیا تھا جب کہ ایک ٹیزر میں ان کی شادی اور پاک فوج میں شمولیت کی جھلکیاں بھی دکھائی گئی تھیں۔

یہ بھی پڑھیں: مداح ماہرہ خان کو لیفٹیننٹ جنرل نگار کے روپ میں دیکھ کر ناخوش

'ایک ہے نگار' میں لیفٹیننٹ جنرل نگار جوہر کی زندگی اور کیریئر کی کہانی بیان کی گئی ہے اور اس کی زیادہ تر شوٹنگ راولپنڈی کے آرمی میڈیکل کالج میں کی گئی ہے لیکن ٹیلی فلم کی شوٹنگ ایبٹ آباد سمیت دیگر علاقوں میں بھی کی گئی تھی۔