خبر رساں ادارے ’ایجنسی فرانس پریس‘ (اے ایف پی) کے مطابق فیس بک انتظامیہ نے 18 اکتوبر کو انٹرنیٹ کا نیا نظام ’میٹاورس‘ بنانے کے لیے یورپی یونین (ای یو) میں 10 ہزار ملازمتیں فراہم کرنے کا اعلان کیا۔

فیس بک انتظامیہ نے واضح نہیں کیا کہ مذکورہ 10 ہزار ملازمتیں صرف یورپی یونین کے شہریوں کو دی جائیں گی یا پھر وہاں دوسرے خطے کے افراد کو بھی رکھا جائے گا۔

فیس بک نے یہ بھی واضح کیا کہ انٹرنیٹ کا نیا نظام ’میٹاورس‘ دنیا کی کوئی بھی کمپنی تنہا نہیں بنا سکتی، اس لیے فیس بک تمام متعلقہ کمپنیوں، حکومتوں اور اداروں کے ساتھ اس کی تیاری کے لیے مکمل تعاون کرے گا۔

فیس بک نے اپنے بلاگ میں واضح کیا کہ نئے انٹرنیٹ نظام کی تیاری کے لیے آئندہ 5 سال میں 10 ہزار افراد کو یورپ میں ملازمتیں فراہم کی جائیں گی اور اداروں کی معاونت کے ذریعے ’میٹاورس‘ تیار کیا جائے گا۔

میٹاورس کیا ہے؟

میٹاورس ابھی صرف خیال ہے اور اس کا خیال سائنس فکشن کتابوں اور فلموں سے لیا گیا ہے اور اسے حقیقت میں تبدیل کرنے کے لیے دنیا بھر کی بڑی انٹرنیٹ ٹیکنالوجیز کمپنیاں اربوں ڈالر کی سرمایہ کاری کریں گی۔

ابھی تک کسی کو معلوم نہیں ہے کہ ’میٹاورس‘ کیسا نظام ہوگا اور وہ کس طرح انسانی زندگی کو آسان بنائے گا یا پھر دنیا پر کس طرح کے اثرات مرتب کرے گا۔

تاہم فیس بک اور مائیکرو سافٹ سمیت تمام بڑی انٹرنیٹ ٹیکنالوجی کمپنیوں کے ماہرین کا کہنا تھا کہ ’میٹاورس‘ ورچوئل ریلٹی (وی آر) اور آگمنٹڈ ریئلٹی (اے آر) سمیت تھری ڈی ٹیکنالوجی کا مشترکہ اور بہتر ورژن ہوگا۔

یعنی کہ ’میٹاورس‘ کو استعمال کرنے کے لیے موبائل فون یا کمپیوٹر کے بجائے آنکھوں پر لگائے جانے والے وی آر ہیڈسیٹ کا سہارا لینا پڑے گا لیکن ممکن ہے کہ مذکورہ ٹیکنالوجی کمپیوٹر اور موبائل کو بھی تبدیل کردے۔

یہ بھی پڑھیں: ماں کا ورچوئل رئیلٹی میں مردہ بیٹی سے 'ملاپ'

زیادہ تر ماہرین کے مطابق ممکنہ طور پر ’میٹاورس‘ کا نظام حالیہ ٹیکنالوجی میں اتنی ہی تبدیلی لائے گا جس طرح 1980 میں بنائے گئے موبائل فونز کو آج کل کے جدید ترین اسمارٹ فونز نے تبدیل کردیا ہے۔

’میٹاورس‘ کو انٹرنیٹ کا نیا نظام کہا جا رہا ہے لیکن یہ واضح نہیں ہے کہ مذکورہ نیا سسٹم خود ہی اپنے انٹرنیٹ سے لیس ہوگا یا حالیہ انٹرنیٹ پر چلے گا؟

زیادہ تر ماہرین کا کہنا ہے کہ چوں کہ تاحال ’میٹاورس‘ ایک خیال ہے، اس لیے اس کی تیاری میں کم از کم 15 سال لگیں گے اور اس کی ابتدائی شکل اگلی ایک دہائی میں سامنے آئے گی۔