وزیراعظم عمران خان نے قوم پر زور دیا تھا کہ اس دن کو غیرمعمولی انداز میں منائیں اور ملک بھر میں نکالے گئے جلوسوں میں مذہبی جذبہ نمایاں تھا جہاں شرکا نے سبز جھنڈے اٹھائے ہوئے تھے اور ان کے نعروں سے نبی اکرم ﷺ سے ان کی عقیدت چھلک رہی تھی۔

عید میلادالنبی کی مناسبت سے سرکاری عمارات، گلیاں، گھر، شاپنگ مالز اور مساجد کو خوب صورتی کے ساتھ روشنیوں اور جھنڈیوں سے سجایا گیا تھا، اسی طرح نوجوانوں نے آتش بازی کا مظاہرہ کیا اور رنگا رنگ لباس میں ریلیاں نکالی اور مارچ کیا۔

حکومت کی جانب سے عید میلادالنبی کے جشن کے لیے کووڈ ایس او پیز کا اعلان کیا گیا تھا لیکن شرکا کو سماجی فاصلے اور ماسک پہننے کی شرط پر عمل نہ کرتے ہوئے دیکھا گیا۔