پاکستان کی ٹیم اب تک ٹورنامنٹ میں ناقابل شکست ہے جس نے اپنے ابتدائی میچ میں روایتی حریف بھارت کو 10 وکٹوں سے شکست دینے کے بعد نیوزی لینڈ، افغانستان، نمیبیا اور اسکاٹ لینڈ کو مات دے کر لگاتار پانچ فتوحات کے ساتھ سیمی فائنل میں جگہ بنائی۔

مزید پڑھیں: ٹی20 کرکٹ میں کسی بھی ٹیم کو آسان تصور نہیں کر سکتے، بابر اعظم

میچ سے قبل محمد رضوان اور شعیب ملک کی فٹنس پر سوالات کھڑے تھے کیونکہ دونوں کھلاڑیوں کو فلو ہوا تھا جس کی وجہ سے دونوں کی میچ میں شرکت سوالات کھڑے ہو گئے تھے۔

تاہم پاکستان کرکٹ بورڈ نے تصدیق کی ہے کہ دونوں کھلاڑی مکمل فٹ ہیں اور میچ میں شرکت کریں گے۔

پاکستان کو اب تک ٹورنامنٹ میں فخر زمان اور حسن علی کی فارم پر شدید تحفظات ہیں کیونکہ دونوں کھلاڑی اب تک ایونٹ میں اچھی کارکردگی نہیں دکھا سکے۔

تاہم ٹیم کے بیٹنگ کوچ میتھیو ہیڈن نے چار میچوں میں محض 54 رنز بنانے والے فخر زمان پر اعتماد کا اظہار کرتے ہوئے امید ظاہر کی ہے کہ وہ سیمی فائنل میں اچھی کارکردگی کا مظاہرہ کریں گے۔

یہ بھی پڑھیں: آسٹریلیا کے خلاف میچ کے لیے محمد رضوان اور شعیب ملک فِٹ قرار

انہوں نے کہاکہ اگر کل فخر کوئی بہترین اننگز کھیلتے ہیں تو میں ہرگز حیران نہیں ہوں گا کیونکہ وہ نیٹ میں گیند کو بہت اچھا ہٹ کررہے ہیں۔

دوسری جانب آسٹریلیا کی ٹیم روایتی حریف انگلینڈ کے ہاتھوں بدترین شکست کے باوجود چار فتوحات حاصل کر کے سیمی فائنل میں جگہ بنانے میں کامیاب رہی۔

آسٹریلیا کی ٹیم کے لیے خوش آئند امر یہ ہے کہ اوپنر ڈیوڈ وارنر کی فارم میں واپسی ہے جو سری لنکا کے خلاف 65 اور ویسٹ انڈیز کے خلاف 89 رنز کی اننگز کھیل چکے ہیں۔

تاہم آسٹریلین مینجمنٹ کے لیے گلین میکسویل کی فارم لمحہ فکریہ ہے جن کے بلے سے اس ٹورنامنٹ میں اب رنز نہیں نکل سکے تاہم ایرون فنچ پرامید ہیں کہ آل راؤنڈر سیمی فائنل میں عمدہ کھیل پیش کریں گے۔

دبئی میں ہونے والے میچ میں ایک مرتبہ پھر ٹاس انتہائی اہمیت کا حامل ہو گا اور ٹاس جیتنے والی ٹیم اوس کے سبب پہلے باؤلنگ کا فیصلہ کرے گی۔

میچ کے لیے دونوں ٹیموں میں کسی تبدیلی کا امکان نہیں ہے۔