کوئٹہ گلیڈی ایٹرز اور ملتان سلطانز کے درمیان آل راؤنڈر کی گلیڈی ایٹرز کی فرنچائز میں منتقلی کے معاملات طے پا گئے جس کے بعد پاکستان سپر لیگ کے اگلے سیزن میں شاہد آفریدی کوئٹہ گلیڈی ایٹرز کی جانب سے کھیلتے ہوئے نظر آئیں گے۔

مزید پڑھیں: پی ایس ایل ڈرافٹ میں کوئی فرنچائز اعظم کو لینا چاہے تو لے سکتی ہے، ندیم عمر

شاہد آفریدی نے گزشتہ سیزن ملتان سلطانز کی نمائندگی کی تھی اور انہوں نے اس سیزن گلیڈی ایٹرز کی نمانئدگی کی خواہش ظاہر کی تھی۔

شاہد آفریدی نے کہا کہ میں کوئٹہ گلیڈی ایٹرز کا حصہ بننے پر بہت پرجوش ہوں، میں چاہتا ہوں کہ اپنا آخری پی ایس ایل ٹائٹل جیت کر کیریئر کا کامیابی کے ساتھ اختتام کروں۔

اس کے علاوہ بھی کوئٹہ گلیڈی ایٹرز میں تین اہم تبدیلیاں ہوئی ہیں جہاں ٹیم میں دو کھلاڑیوں کو شامل کیا گیا ہے ۔

گزشتہ سیزن میں اسلام آباد یونائیٹڈ کی نمائندگی کرنے والے افتخار احمد بھی گلیڈی ایٹرز کا حصہ بن گئے ہیں جبکہ ان کی جگہ اعظم خان یونائیٹڈ کی ٹیم کا حصہ بن گئے ہیں۔

افتخار احمد نے کہا کہ اسلام آباد یونائیٹڈ کو چھوڑنا آسان فیصلہ نہیں تھا لیکن ٹی20 کرکٹ میں اپنے مستقبل کو مدنظر رکھتے ہوئے میں سمجھتا ہوں کہ یہ میرے لیے بہترین فیصلہ ہے، میں اسلام آباد یونائیٹڈ کی مینجمنٹ کا شکر گزار ہوں جو میرے تمام فیصلوں میں میرے ساتھ کھڑے رہے۔

اس کے علاوہ انگلینڈ کے جیمز ونس بھی ملتان سلطانز سے گلیڈی ایٹرز میں شامل ہو گئے ہیں اور ان کی جگہ سلطانز ڈرافٹ کے عمل کے دوران ندیم عمر کی فرنچائز کی ڈائمنڈ اور سلور کیٹیگری میں کھلاڑیوں کا انتخاب کریں گے۔

واضح رہے کہ پی ایس ایل کے ساتویں سیزن کے لیے کھلاڑیوں کی ڈرافٹنگ 12 دسمبر کو ہوگی جبکہ میگا ایونٹ کا آغاز آئندہ سال 27 جنوری سے کراچی میں ہوگا اور پہلا میچ دفاعی چمپیئن ملتان سلطانز اور کراچی کنگز کے مابین کھیلا جائے گا۔