خبر رساں ادارے ’رائٹرز’ کے مطابق پیرس میں ہونے والے معروف فیشن برانڈ ’چینلز’ کے خصوصی ملبوسات کے شو کے دوران موناکو کی شہزادی 35 سالہ شارلٹ کاسی راگی گھوڑے پر سوار ہوکر سامنے آئیں۔

فیشن ہاؤس کی جانب سے جاری کردہ شو کی ویڈیو میں دیکھا جا سکتا ہے کہ نت نئے اور خصوصی لباسوں کو متعارف کرائے جانے کے شو کا آغاز ہی موناکو کی شہزادی شارلٹ کاسی راگی کی انٹری سے ہوتا ہے۔

فیشن ہاؤس کی جانب سے جاری کردہ ویدیو میں موناکو کی شہزادی کو سیاہ لباس میں گھوڑے پر اسٹیج پر گھڑ سواری کرتے دیکھا جا سکتا ہے۔

ویڈیو میں دیکھا جا سکتا ہے کہ موناکو کی شہزادہ ابتدائی طور پر گھوڑے کو آرام سے پورے اسٹیج پر کیٹ واک کرواتی ہیں اور آخر میں تیزی سے انہیں دوڑاتی ہوئی اسٹیج سے باہر چلی جاتی ہیں۔

موناکو کی شہزادی کی گھڑ سواری کے بعد ہی باقی ماڈلز نے نت نئے، دیدہ زیب اور خصوصی ملبوسات کو پیش کیا۔

موناکو کی شہزادی شارلٹ کاسی راگی نہ صرف ماڈلنگ کرتی ہیں بلکہ وہ اداکارہ بھی ہیں، ساتھ ہی وہ شاعری بھی کرتے ہیں جب کہ وہ موسیقی میں بھی دلچسپی رکھتی ہیں۔

دیگر یورپی ممالک کی شاہی خاندانوں کے برعکس موناکو کا شاہی خاندان فیشن اور آرٹ میں کچھ زیادہ ہی دلچسپی لیتا ہے اور شارلٹ کاسی راگی کی دادی بھی اداکارہ تھیں۔

شہزادی شارلٹ کاسی راگی کو اپنے بولڈ اور رومانوی مزاج کی وجہ سے بھی کافی شہرت حاصل ہے، انہوں نے دو شادیاں کیں اور انہیں دونوں شوہروں سے ایک ایک بیٹا بھی ہے۔

شہزادی شارلٹ کاسی راگی نے دوسری شادی 2019 میں پہلی شادی کے طلاق پر ختم ہونے کے ایک سال بعد کی تھی۔

شارلٹ کاسی راگی بادشاہت کے حوالے سے موناکو کے شاہی خاندان میں گیارہویں نمبر پر ہیں۔

شہزادی شارلٹ کاسی راگی نے جہاں گھوڑے پر سوار ہوکر شہزادیوں کے لباس کو متعارف کرایا، وہیں وہ فرانسیسی فیشن ہاؤس ’چینلز’ کی حال ہی میں برانڈ ایمبیسیڈر بھی مقرر ہوئی ہیں۔