حکومت پنجاب نے بدنام زمانہ سیریل کلر ’جاوید اقبال’ کی زندگی پر بنائی گئی فلم کی ریلیز پر 26 جنوری کو پابندی لگائی تھی۔

صوبائی فلم سینسر بورڈ نے فلم کی ریلیز سے محض 2 دن قبل اس کی نمائش پر پابندی لگائی تھی۔

یہ بھی پڑھیں: ’جاوید اقبال’ کی زندگی پر بنی فلم پر پنجاب میں پابندی

پنجاب سینسر بورڈ کی جانب سے نمائش کی پابندی لگائے جانے کے بعد فلم کو باقی ملک میں بھی ریلیز نہیں کیا گیا۔

دلچسپ بات یہ ہے کہ فلم کی ٹیم نے 27 جنوری کو ّ’جاوید اقبال: دی اَن ٹولڈ اسٹوری آف آ سیریل کلر' کا کراچی میں پریمیئر بھی کیا تھا اور فلم کو شوبز شخصیات اور میڈیا سے وابستہ افراد کو دکھایا بھی گیا تھا۔

فلم کی نمائش پر پنجاب سینسر بورڈ کی جانب سے پابندی لگائے جانے کے بعد ابتدائی طور پر یاسر حسین نے ’جسٹس فار جاوید اقبال فلم‘ کا ہیش ٹیگ استعمال کرتے ہوئے صوبائی حکومت کے فیصلے کی مذمت کی تو باقی شخصیات نے بھی ٹرینڈ میں حصہ لیا۔

یاسر حسین کے علاوہ فلم کی مرکزی اداکارہ عائشہ عمر نے بھی پنجاب سینسر بورڈ کی جانب سے فلم کی نمائش پر پابندی عائد کیے جانے پر انسٹاگرام پوسٹ کرتے ہوئے ’جسٹس فار جاوید اقبال فلم‘ کا ہیش ٹیگ استعمال کیا اور صوبائی حکومت کے فیصلے پر افسوس کا اظہار کیا۔

یاسر حسین کے بعد متعدد شوبز شخصیات نے بھی ’جسٹس فار جاوید اقبال فلم‘ کا ہیش ٹیگ استعمال کرتے ہوئے ٹوئٹر، فیس بک اور انسٹاگرام پر پوسٹس کرتے ہوئے پنجاب حکومت کے فیصلے کی مذمت کرتے ہوئے اسے فلم انڈسٹری کے لیے نقصان دہ قرار دیا۔

اداکار علی رحمٰن خان نے بھی یاسر حسین اور عائشہ عمر کی فلم کی نمائش پر پابندی لگانے پر آواز اٹھائے اور انہوں نے بھی ہیش ٹیگ استعمال کرتے ہوئے ٹوئٹ کی کہ ہمیں ذاتی خواہشات سے بالاتر ہوکر کام کرنا پڑے گا اور ہمیں ہر حال میں سچی کہانیوں پر مبنی فلموں اور ڈراموں کو اجازت دینی ہوگی۔

عثمان خالد بٹ نے بھی فلم کی نمائش پر پابندی عائد کیے جانے پر دکھ کا اظہار کرتے ہوئے اسے فوری طور پر ریلیز کرنے کا مطالبہ کیا۔

انہوں نے مزید لکھا کہ جب تمام سینسر بورڈز نے فلم کو نمائش کی اجازت دے دی تھی تو پھر آخر میں فلم کے خلاف کہاں سے شکایات آئیں؟۔

شوبز شخصیات کے علاوہ عام افراد نے بھی یاسر حسین اور اقرا عزیز کی فلم کی نمائش پر پابندی عائد کیے جانے کے خلاف آواز اٹھائی اور انہوں نے بھی فلم کو جلد ریلیز کرنے کی اجازت دینے کا مطالبہ کیا۔