حسن احمد اور سنیتا مارشل نے 2008 میں شادی کی تھی، دونوں کا مذہب مختلف ہے۔

حسن احمد کا تعلق مذہب اسلام جب کہ سنیتا مارشل مسیحیت کی پیروکار ہیں اور دونوں کی شادی کو 13 سال کا عرصہ گزر چکا ہے۔

دونوں کے دو بچے بھی ہیں، جن میں سے ایک بیٹا اور ایک بیٹی ہیں جو مذہب اسلام کو فالو کرتے ہیں۔

مختلف مذاہب سے تعلق رکھنے کی وجہ سے دونوں کو شادی میں کئی مشکلات بھی پیش آئیں اور ان سے خاندان کے لوگ بھی ناراض رہے۔

حال ہی میں دونوں نے ’وائس آف امریکا‘ (وی او اے اردو) کو دیے گئے انٹرویو میں اپنی ازدواجی زندگی میں آنے والی مشکلات پر کھل کر باتیں کیں اور بتایا کہ کس طرح لوگ ان کی شادی پر اب تک اعتراض اٹھاتے ہیں۔

حسن احمد کے مطابق نہ صرف عام لوگوں بلکہ ان کے اہل خانہ نے بھی سنیتا مارشل سے شادی پر اعتراض کیا اور وہ کافی عرصے تک ناراض رہے۔

انہوں نے بتایا کہ انہیں شادی کیے ہوئے 13 سال گزر چکے ہیں، جن میں سے 9 سے 10 تک انہوں نے صرف ایک دوسرے کو سمجھنے میں لگا دیے۔

اداکار کے مطابق انہیں ایک دوسرے کے جذبات، مذاہب اور فطرت کو مکمل طور پر سمجھنے میں دو دہائیاں لگیں اور یہ بھی سچ ہے کہ شادی کے بعد شادی سے پہلے کی باتیں کتابی رہ جاتی ہیں۔

حسن احمد نے بتایا کہ انہیں سنیتا مارشل سے اظہار محبت کرنے یا انہیں شادی کی پیش کش کرنے میں کسی طرح کی ہچکچاہٹ نہیں ہوئی تھی، وہ بالکل سیدھے بندے ہیں اور لڑکیوں کے معاملے میں تو بہت ہی صاف ہیں۔

پروگرام میں بات کرتے ہوئے سنیتا مارشل نے بھی بتایا کہ ان کے والدین بھی ان کی شادی پر ناراض ہوئے اور انہیں منانے میں کافی وقت لگا مگر وہ مان گئے۔

یہ بھی پڑھیں: میرے شوہر کو 35 روز کے لیے اغوا کرلیا گیا تھا: سنیتا مارشل

اداکارہ کا کہنا تھا کہ عوام کے مقابلے میں والدین یا اہل خانہ کو سمجھنا پھر بھی آسان ہے اور والدین ہونے کے ناتے انہیں بات کو سمجھنا بھی پڑتا ہے۔

بچوں کے مذہب اور عقیدے سے متعلق پوچھے گئے سوال پر سنیتا مارشل نے بتایا کہ ان کے دونوں بچے مذہب اسلام کے پیروکار ہیں۔

ماڈل و اداکارہ نے وضاحت کی کہ شادی کے وقت ہی انہوں نے اور حسن احمد نے طے کرلیا تھا کہ ان کے بچوں کا مذہب اسلام ہوگا۔

سنیتا مارشل اور حسن احمد نے بتایا کہ ان کے بچے نہ صرف مذہب اسلام کے پیروکار ہیں بلکہ وہ والدہ کے مذہب مسیحیت کو بھی اچھی طرح سمجھتے ہیں۔

ایک سوال کے جواب میں سنیتا مارشل نے کہا کہ بطور اقلیتی اداکارہ انہیں کبھی کسی تفریق کا سامنا نہیں کرنا پڑا، انہیں کبھی کسی خوف سے نہیں گزرنا پڑا، ان سے سب عزت و احترام سے ملتے ہیں۔