شہباز گِل نے 21 مارچ کو دارالحکومت اسلام آباد میں میڈیا سے گفتگو کرتے ہوئے ایک خاتون صحافی کے سوال کا جواب دیتے ہوئے نامناسب الفاظ کا استعمال کیا، جس کی وجہ سے ان پر تنقید کی جا رہی ہے۔

معاون خصوصی سے خاتون صحافی نے سوال کیا تھا کہ وہ اپنی تقریر میں دوسروں کے لیے نامناسب لفظ ’دلال‘ بار بار کیوں استعمال کر رہے تھے۔

خاتون کے سوال کے جواب میں شہباز گل نے نامناسب الفاظ کا انتخاب کرتے ہوئے عامیانہ الفاظ کا استعمال کیا اور دعویٰ کیا کہ ’پنجاب میں جس خاتون کے شوہر انتقال کر جاتے ہیں تو اس خاتون کو ’بیوہ‘ کے بجائے دوسرے نازیبا لفظ سے پکارا جاتا ہے۔ (ہم اس لفظ کو یہاں لکھ نہیں سکتے)

انہوں نے مزید کہا کہ ’دلال‘ پنجابی زبان کا لفظ ہے جو کہ انگریزی کے لفظ ’بروکر‘ کا ترجمہ ہے۔

شہباز گِل کی جانب سے پنجابی زبان میں بیوہ خاتون کے لیے نازیبا لفظ استعمال کرنے کے معاملے پر لوگوں نے انہیں تنقید کا نشانہ بنایا اور ان کی ویڈیو وائرل ہوگئی۔

۔

زیادہ تر لوگوں نے شہباز گِل کی جانب سے غلط زبان استعمال کرنے کے سوال پر نامناسب الفاظ کے ذریعے جواب دینے پر حیرانی کا اظہار کرتے ہوئے انہیں تنقید کا نشانہ بنایا۔

فیضان لاکھانی نے شہباز گِل کے بیان پر ٹوئٹ کی کہ معاون خصوصی کبھی کسی کو اجازت نہیں دیں گے کہ ان کے خاندان کی خواتین کے لیے بھی ایسے الفاظ استعمال کیے جائیں، ساتھ ہی انہوں نے لکھا کہ سب کی مائیں ایک جیسی ہی ہوتی ہیں۔

صحافی عباص ناصر نے معاون خصوصی کے جواب پر تنقید کرتے ہوئے لکھا کہ پروفیسر شہباز گل صاحب پنجابی زبان کی خوبصورتی کو بیان کر رہے ہیں۔

ان کی طرح ٹی وی اینکر ابصا کومل نے بھی شہباز گل پر تنقید کی اور انہیں خبردار کیا کہ وہ اپنے نازیبا الفاظ کو جواز فراہم کرنے لئے پنجابی زبان کو بدنام نہ کریں اور یہ کہ اس خوبصورت زبان کو جاننا ہے تو بابا بُلھے شاہ کو پڑھیں۔

بعض لوگوں نے نشاندہی کی کہ معاون خصوصی برائے وزیر اعظم کی گفتگو ریاستی ٹیلی وژن پر براہ راست دکھائی گئی، جس میں انہوں نے عورتوں کے لیے گالی کے طور پر استعمال ہونے والے لفظ کا استعمال کیا، ساتھ ہی سوال کیا کہ مذکورہ معاملے پر پاکستان الیکٹرانک میڈیا ریگولیٹری اتھارٹی (پیمرا) نوٹس لے کر کارروائی کرے گا؟

جہاں شہباز گل پر زیادہ تر لوگوں نے تنقید کی، وہیں کچھ لوگوں نے ان کا ساتھ دیتے ہوئے ٹوئٹس کیں کہ اردو اور پنجابی زبان میں ایک ہی لفظ کے متعدد معنی بھی ہوتے ہیں، معاون خصوصی ٹھیک کہہ رہے ہیں۔