انوشے اشرف نے انسٹاگرام اسٹوری میں حال ہی میں سابق وزیر اعظم عمران خان کی جانب سے اداکار شان شاہد کو ہم نیوز کے لیے دیے گئے انٹرویو کے کلپ کا اسکرین شاٹ شیئر کرتے ہوئے بشریٰ بی بی کی حمایت کی۔

انوشے اشرف نے اپنی پوسٹ میں لکھا کہ اگرچہ بشریٰ بی بی نے خود کو میڈیا کی آنکھ سے دور رکھنے کی حتی الامکان کوشش کی ہے، تاہم اس کے باوجود ان پر سخت نظر رکھی جاتی ہے اور ان پر تنقید کا کوئی موقع نہیں گنوایا جاتا۔

انہوں نے لکھا کہ ہر کوئی ان سے متعلق غلط باتیں ہی لکھتا ہے۔

ساتھ ہی انوشے اشرف نے سابق خاتون اول سے ملاقات کرنے کی خواہش کا اظہار کرتے ہوئے سوال بھی کیا کہ کیا کوئی ان کی ملاقات بشریٰ بی بی سے کروا سکتا ہے؟

یہ بھی پڑھیں؛ صرف ایک احمق ہی اپنی اہلیہ کے ساتھ ہر معاملے پر بات نہیں کرتا، وزیراعظم

انوشے اشرف نے جس ویڈیو کلپ کا اسکرین شاٹ شیئر کیا، اس میں لکھا ہوا تھا کہ بشری بی بی عمران خان پر کس بات پر سختی کرتی ہیں؟

مذکورہ کلپ میں عمران خان نے عید الفطر کے موقع پراداکار شان شاہد کو ہم نیوز کے لیے دیے گئے انٹرویو میں اہلیہ بشریٰ بی بی کی تعریفیں کی تھیں۔

عمران خان نے کہا تھا کہ بشریٰ بی بی نے ہی ان کے بنی گالا کے گھر کو گھر بنایا اور ان کے آنے کے بعد ہی ان کے ہاں آنے والے مہمانوں کی خاطر خواہ خدمت ہونے لگی۔

عمران خان کے مطابق بشریٰ بی بی سے قبل وہ بنی گالا میں اکیلے رہتے تھے اور وہاں مہمانوں کی خدمت کرنے والا کوئی نہیں ہوتا تھا۔

مزید پڑھیں؛ عمران خان کی سوتیلی بیٹی تحریک انصاف میں شامل

سابق وزیر اعظم نے ایک قصہ بھی بتایا کہ بشریٰ بی بی سے قبل جب ان سے اس وقت امریکی سفیر بنی گالا میں ملنے آئے تو ان کے ملازم باہر سے بسکٹ کا پیکٹ لے کر آئے اور سفیر کے سامنے پیکٹ ہی رکھ دیا۔

انہوں نے بشریٰ بی بی کی تعریفیں کیں اور کہا کہ ان کے آنے کے بعد ان سے ملنے آنے والے مہمانوں کی خاطر خواہ خدمت ہونے لگی اور وہ ان پر اس وقت ناراض ہو جاتی تھیں جب مہمانوں کی خدمت میں کوئی کسر رہ جاتی تھی۔

خیال رہے کہ عمران خان اور بشریٰ بی بی نے 19 فروری 2018 کو شادی کی تصدیق کی تھی، عمران خان کی یہ تیسری جب کہ بشریٰ بی بی کی دوسری شادی ہے۔