ڈان کی رپورٹ کے مطابق میڈیا رپورٹس میں بتایا گیا ہے کہ پنجاب کے شہر جہلم کے علاقے صدر میں ملزمان خاتون کے گھر میں گھسے، خاتون کے شوہر پر تشدد کیا اور اسے رسی سے باندھنے کے بعد خاتون کو اجتماعی زیادتی کا نشانہ بنایا۔

پولیس حکام کے مطابق خاتون کا طبی معائنہ کرایا گیا ہے اور ان کے خون کے نمونے فرانزک ٹیسٹ کے لیے لاہور بھجوا دیے گئے ہیں جبکہ پولیس نے متاثرہ خاتون کے شوہر کی شکایت پر مقدمہ درج کر لیا ہے۔

یہ بھی پڑھیں: ملتان سے کراچی آنے والی ٹرین میں خاتون سے اجتماعی زیادتی، 2 ملزمان گرفتار

انسپکٹر جنرل پنجاب پولیس راؤ سردار علی خان نے واقعے کا فوری نوٹس لیتے ہوئے راولپنڈی کے ریجنل پولیس افسر سے رپورٹ طلب کر لی ہے۔

جہلم پولیس نے واقعے کے چند گھنٹوں کے اندر ہی مقدمے کے 3 ملزمان کو گرفتار کر لیا جبکہ گرفتار ہونے والوں میں مرکزی ملزم بھی شامل ہے جو پیشے کے لحاظ سے رکشہ ڈرائیور ہے۔

ضلعی پولیس افسر کامران ممتاز نے بتایا کہ ایک خصوصی ٹیم تشکیل دی گئی ہے جو فرار ہونے والے دیگر ملزمان کی گرفتاری کے لیے چھاپے مار رہی ہے۔