دونوں رہنماؤں نے22 جولائی کو ہونے والے صوبائی اسمبلی میں وزیر اعلیٰ کے انتخاب سے قبل کم از کم دو بار ملاقاتیں کی تھیں۔

دونوں کے درمیان 20 اور 21 جولائی کو ملاقاتیں ہوئیں تھیں، جس کے بعد 22 جولائی کو انتخابات میں چوہدری شجاعت حسین نے پاکستان مسلم لیگ (ن) کے امیدوار حمزہ شہباز کی حمایت کا اعلان کیا۔

چوہدری شجاعت اور آصف علی زرداری کے درمیان ہونے والی ملاقات کی تصاویر حمزہ شہباز کے دوبارہ وزیر اعلیٰ منتخب ہونے کے بعد اس وقت تیزی سے وائرل ہوئیں جب کہ ایک برانڈ نے دونوں شخصیات کی تصاویر دلچسپ کیپشن کے ساتھ شیئر کیں۔

حمزہ شہباز کے منتخب ہونے کے بعد صوفے اور آرامدہ کرسیاں بنانے والے برانڈ ’ہائی لایف‘ نے آصف علی زردار اور چوہدری شجاعت کی ملاقات کی تصاویر شیئر کرتے ہوئے دلچسپ کیپشن لکھا۔

برانڈ نے دونوں رہنماؤں کی صوفے پر بیٹھ کر مذاکرات کرنے کی تصویر کو فیس بک اسٹوری میں شیئر کیا اور کیپشن میں لکھا کہ ’ان کا ریکلائر نامی آرامدہ صوفہ مشکل وقت میں کڑے فیصلے بھی سکون سے کرنے میں مدد فراہم کرتا ہے‘۔

برانڈ کی جانب سے دونوں شخصیات کی تصاویر دلچسپ کیپشن کے ساتھ شیئر کرنے کے بعد وائرل ہوگئی اور لوگوں نے اس پر دلچسپ تبصرے کرنے سمیت اس پر میمز بھی بنائیں۔

زیادہ تر لوگوں نے دونوں رہنماؤں کی تصاویر کو ایڈٹ کرکے ان پر مزاحیہ میمز بنائیں، تاہم بعض لوگوں نے ان پر سخت تنقید کرتے ہوئے نامناسب میمز بھی بنائیں۔