اس وقت سام سنگ کے موبائل فونز میں 100 میگا پکسل کا کیمرا بھی متعارف نہیں کرایا گیا اور نہ ہی دنیا کی کسی اور موبائل کمپنی نے اب تک 200 میگا پکسل کا کیمرا متعارف کرایا ہے۔

تاہم بعض فونز نے 150 میگا پکسل تک کیمرا متعارف کرا رکھا ہے لیکن اب خبریں ہیں کہ سام سنگ کیمرا ٹیکنالوجی کو آگے بڑھاتے ہوئے فون میں 450 میگا پکسل کا کیمرا متعارف کرائے گی۔

ٹیکنالوجی ویب سائٹ ’سام موبائل‘ نے اپنی رپورٹ میں ایک اور ویب سائٹ کا حوالہ دیتے ہوئے بتایا کہ سام سنگ نے کوریا میں کیمرا ٹیکنالوجی کا ایک ٹریڈ مارک رجسٹر کروایا ہے، جو نئی ٹیکنالوجی پر مشتمل ہے۔

رپورٹ کے مطابق کمپنی نے ٹریڈ مارک میں کیمرا کے پکسل کی تفصیل فراہم کیے بغیر اس میں ٹیکنالوجی کا ذکر کیا ہے جو کہ ایڈوانس کیمرا ٹیکنالوجی ہے۔

کمپنی نے رجسٹریشن میں ہیکسا پکسل نامی ٹیکنالوجی کا ذکر کیا ہے، جس کا ایک پکسل 23 میگا پکسل کے برابر ہوتا ہے، اسی حساب سے ٹریڈ مارک فارم میں فراہم کی گئی معلومات کے مطابق کمپنی کا کیمرا 450 میگا پکسل کا ہوسکتا ہے۔

کمپنی نے ٹریڈ مارک رجسٹریشن میں اس بات کی بھی کوئی معلومات فراہم نہیں کی کہ مذکورہ ٹیکنالوجی میں کمپنی کو کس کی معاونت حاصل ہے؟

اگرچہ سام سنگ نے ٹریڈ مارک کی رجسٹریشن کے لیے درخواست جمع کرائی ہے، تاہم ٹیکنالوجی ماہرین کے مطابق 450 میگا پکسل کیمرے کی تیاری میں چند سال لگ سکتے ہیں۔

ممکنہ طور پر 450 میکا پکسل کے کیمرے کی تیاری میں 2 سال لگیں گے اور اسے 2024 کے اختتام یا پھر 2025 کے آغاز تک متعارف کرایا جا سکتا ہے، تاہم اس سے یہ بھی عندیہ ملتا ہے کہ سام سنگ اپنے نئے موبائل میں کیمرے کی ٹیکنالوجی کو مزید اپ گریڈ کرے گی۔