چترنگدا سنگھ نے 2003 میں اداکاری کا آغاز ’ہزاروں خواہشیں ایسی‘ فلم سے کیا تھا اور گزشتہ 20 سال میں انہوں نے متعدد فلموں میں شاندار کردار ادا کیے۔

چترنگدا سنگھ نے اگرچہ اب تک محض تین درجن فلموں میں ہی کام کیا ہے، تاہم انہوں نے شاندار کرداروں کی وجہ سے کافی شہرت حاصل کی جب کہ انہیں ماڈلنگ اور فلموں میں آئٹم سانگ کرنے کی وجہ سے بھی شہرت حاصل رہی۔

اداکاری کے بعد انہوں نے اب فلم پروڈکشن کا کام بھی شروع کردیا ہے اور انہوں نے 2018 کی فلم ’سورما‘ کو بھی پروڈیوس کیا تھا اور اب وہ ویب سیریز میں بھی اداکاری کرنے لگی ہیں۔

حال ہی میں انہوں نے متحدہ عرب امارات (یو اے ای) کی شوبز میگزین ’مصالحہ‘ کے لیے فوٹوشوٹ کروایا اور انہوں نے میگزین کو انٹرویو بھی دیا۔

اداکارہ کی تصاویر کو اگست کے ڈیجیٹل شمارے کی زینت بھی بنایا گیا اور ان سے انٹرویو کے دوران مہوش حیات کے ہم شکل ہونے سے متعلق بھی پوچھا گیا۔

اداکارہ نے مہوش حیات سے متعلق بات کرتے ہوئے ان کی اداکاری اور خوبصورتی کو سراہا اور کہا کہ تاحال انہوں نے ان کی ویب سیریز ’مس مارول‘ نہیں دیکھی۔

چترنگدا سنگھ کا کہنا تھا کہ انہیں متعدد لوگ کہہ چکے ہیں کہ وہ مہوش حیات کی ہم شکل لگتی ہیں جب کہ سوشل میڈیا پر انہیں لوگ مختلف کمنٹس میں مینشن کرکے ان سے اس ضمن میں سوالات بھی کرتے رہتے ہیں۔

اداکارہ نے بتایا کہ زیادہ تر لوگوں کو ایسا بھی لگتا ہے کہ وہ اور مہوش حیات جڑواں بہنیں ہیں اور وہ ان سے یہی سوال بھی کرتے ہیں۔

چترنگدا سنگھ نے کہا کہ وہ مہوش حیات سے متعلق اتنا کہیں گی کہ وہ بہت ہی پُرکشش اور خوبصورت خاتون ہیں۔

ساتھ ہی انہوں نے دعویٰ کیا کہ نہ صرف وہ بلکہ مہوش حیات بھی پُرکشش خاتون ہیں۔

اداکارہ کی جانب سے مہوش حیات سے متعلق بات کرنے اور انہیں بھی اپنی طرح پرکشش کہے جانے کی بات سوشل میڈیا پر وائرل ہوگئی اور سوشل میڈیا صارفین نے ان کی بات سے اتفاق بھی کیا۔

مہوش حیات کو چترنگدا سنگھ کے علاوہ بولی وڈ اداکارہ نرگس فخری کا ہم شکل بھی کہا جاتا ہے۔