سائرہ یوسف ان کے بیٹے اداکار شہروز سبزواری کی سابق اہلیہ ہیں، دونوں نے 2012 میں شادی کی تھی اور ان کا ایک بیٹا ‘نورے’ بھی ہے۔

دونوں کے درمیان 2019 کے اختتام پر علیحدگی کی خبریں سامنے آئی تھیں، جس کے بعد دونوں نے مارچ 2020 میں طلاق ہوجانے کی تصدیق کی تھی۔

یہ بھی پڑھیں: طلاق کے بعد شہروز اور سائرہ جلد فلم میں ساتھ نظر آئیں گے

طلاق کے بعد شہروز سبزواری نے مئی 2020 میں ہی ماڈل صدف کنول سے شادی کرلی تھی، جن سے انہیں حال ہی میں بیٹی کی پیدائش ہوئی تھی۔

اگرچہ شہروز سبزواری نے طلاق کے دو ماہ بعد ہی شادی کرلی تھی مگر سائرہ یوسف نے تاحال دوسری شادی نہیں کی۔

ان کی دوسری شادی کے معاملے پر حال ہی میں بہروز سبزواری نے ایک انٹرویو میں کھل کر بات کی اور کہا کہ اگر ان کی سابق بہو دوسری شادی کرنا چاہیں تو وہ ان کی سپورٹ کے لیے ان کے ساتھ کھڑے ہوں گے۔

‘فوچیا میگزین’ کو دیے گئے انٹرویو میں بہروز سبزواری نے اس بات کا شکوہ بھی کیا کہ جب ان کے بیٹے اور بہو کے درمیان طلاق ہوگئی تو سوشل میڈیا پر ان کے پورے خاندان کو تنقید کا نشانہ بنایا گیا۔

ان کے مطابق لوگ سمجھتے ہیں کہ اداکار ہونے کے ناتے ہم ان کی ملکیت ہیں، اس لیے ہر کوئی ان پر تنقید کرتا ہے۔

بہروز سبزواری نے بیٹے اور بہو کے درمیان طلاق کے وقت کو اپنے پورے خاندان کے لیے مشکل قرار دیا اور کہا کہ اگر ان کے بیٹے اور سائرہ یوسف کی کیمسٹری نہیں ملی تو وہ اس حوالے سے کچھ نہیں کر سکتے تھے، کیوں کہ یہ سب اللہ کی مرضی تھی۔

اسی حوالے سے انہوں نے بات کو جاری رکھتے ہوئے کہا کہ سائرہ یوسف ان کی بیٹی تھیں اور بیٹی رہیں گی اور ان کی بیٹی ‘نورے’ ان کی جان ہیں۔

بہروز سبزواری نے انکشاف کیا کہ وہ متعدد بار سائرہ یوسف کو دوسری شادی کرنے کا کہ چکے ہیں اور اگر وہ شادی کریں گی تو وہ ان کی سپورٹ کے لیے ان کے ساتھ کھڑے ہوں گے۔

ان کے مطابق وہ سائرہ یوسف سے کہتے رہے ہیں کہ تم شادی کیوں نہیں کر سکتیں؟