’ڈھائی چال‘ کا پہلا گانا ’نکلو پاکستان کی خاطر‘ یوم دفاع کے موقع پر ریلیز کیا گیا، جس میں فلم کے مرکزی کرداروں کو دکھایا گیا ہے۔

’نکلو پاکستان کی خاطر‘ کو ساحر علی باگا نے گایا ہے، جس میں پاکستان کے گمنام ہیروز کو خراج تحسین پیش کیا گیا ہے۔

گانے میں فلم کے مرکزی کرداروں کی جھلکیاں بھی دکھائی گئی ہیں، گانے سے پہلے رواں برس مارچ میں فلم کا ٹریلر جاری کرتے ہوئے اسے رواں برس ہی ریلیز کرنے کا عندیہ دیا گیا تھا، تاہم اس کی تاریخ کا اعلان نہیں کیا گیا تھا۔

ڈھائی چال‘ کو تین سال قبل 2019 میں بنانے کا اعلان کیا گیا تھا اور امکان تھا کہ اسے 2020 کی پہلی سہ ماہی میں ریلیز کردیا جائے گا، تاہم ایسا نہ ہوسکا تھا۔

اطلاعات تھیں کہ فلم کو جون 2022 میں ممکنہ طور پر ریلیز کیا جائے گا، تاہم مختلف وجوہات کی بنا پر اس کی نمائش مؤخر کردی گئی تھی۔

ہدایت کار تیمور شیرازی کی فلم کی کہانی فرحین چوہدری نے لکھی ہے جب کہ اسے ڈاکٹر عرفان اشرف نے پروڈیوس کیا ہے۔

ہمایوں اشرف، عائشہ عمر، شمعون عباسی، عدنان شاہ ٹیپو، سلیم معراج، اریج چوہدری اور رشید ناز سمیت دیگر اداکاروں پر مبنی فلم کے ٹریلر سے عندیہ ملتا ہے کہ اس کی کہانی پاکستان میں بھارتی مداخلت اور دہشت گردی کے گرد گھومتی ہے۔

فلم کے ٹریلر میں اہم کرداروں کو دکھایا گیا ہے جو کہ پڑوسی ملک بھارت کی پاکستان میں مداخلت سے متعلق باتیں کرتے دکھائی دیے۔

ٹریلر میں دکھایا گیا تھا کہ جب بھی بھارت کو اپنے مذموم مقاصد پورے کرنے ہوتے ہیں تب وہ اپنے ہی شہریوں کو مار کر اس کا الزام پاکستان پر لگا دیتا ہے۔

فلم میں عائشہ عمر کو ایک صحافی کے طور پر دکھایا گیا تھا جو کہ شمعون عباسی کی چال چلتی دکھائی دیتی ہیں۔

شمعون عباسی کے کردار کو مبہم رکھا گیا تھا اور اسے ٹریلر سے سمجھنا ناممکن ہے۔