دپیکا پڈوکون اور رنویر سنگھ کے درمیان اختلافات اور علیحدگی کی خبریں گزشتہ ماہ ستمبر کے آخر میں اس وقت سامنے آئی تھیں جب کہ ایک ٹوئٹر صارف نے اپنی ٹوئٹ میں دعویٰ کیا تھا کہ دونوں کے درمیان سب کچھ ٹھیک نہیں۔

مذکورہ ٹوئٹ کے بعد بھارتی میڈیا میں بھی ان کے درمیان اختلافات اور علیحدگی کی خبریں سامنے آئیں، تاہم اس باوجود دونوں نے ایک ساتھ کوئی تصویر یا وضاحتی بیان جاری نہیں کیا۔

یہ بھی پڑھیں: دپیکا پڈوکون و رنویر سنگھ میں علیحدگی کی خبروں پر مداح پریشان

البتہ دونوں نے سوشل میڈیا پر ایک دوسرے کی تصاویر پر کمنٹس کرکے یہ تاثر دینے کی کوشش کی کہ ان کے درمیان سب کچھ ٹھیک چل رہا ہے لیکن اس باوجو ان کے درمیان اختلافات کی خبریں پھیلتی رہیں، جس کے بعد اب دپیکا پڈوکون نے وضاحت کردی۔

’ہندوستان ٹائمز‘ کے مطابق دپیکا پڈوکون نے حال ہی میں برطانوی شہزادے ہیری کی اہلیہ و سابق اداکارہ میگھن مارکل کے پوڈ کاسٹ میں شوہر سے متعلق بھی بات کی اور بتایا کہ ان کے شوہر جب کام سے تھکے ہوئے گھر میں داخل ہوتے ہیں تو ان کا چہرہ دیکھ کر مسکرا اٹھتے ہیں۔

دپیکا پڈوکون نے واضح کیا کہ رنویر سنگھ کچھ عرصے سے مصروف ہیں تھے، وہ میوزک فیسٹیولز کی وجہ سے ان سے دور تھے لیکن حال ہی میں وہ کام سے فری ہوکر گھر آئے ہیں۔

اداکارہ نے بتایا کہ مصروفیات کے بعد جب ان کے شوہر گھر آئے تو ان کا چہرہ دیکھ کر خوش ہوئے۔

مزید پڑھیں: علیحدگی کی خبروں کے بعد دپیکا اور رنویر کا ایک دوسرے کے لیے محبت کا اظہار

دپیکا پڈوکون نے پوڈ کاسٹ میں ذہنی صحت سے متعلق بھی بات کی اور کہا کہ پہلی بار ان میں انزائٹی اور ڈپریشن کی علامات کو ان کی والدہ نے پہچانا اور انہوں نے ہی ان کی مدد کی۔

پوڈ کاسٹ کے دوران میگھن مارکل نے بھی ذہنی صحت پر بات کی اور اعتراف کیا کہ ان کے شوہر شہزادہ ہیری نے ان کی کافی مدد کی۔

خیال رہے کہ شہزادہ ہیری اور میگھن مارکل نے شاہی زندگی چھوڑ کر امریکا میں عام زندگی گزارنا شروع کرنے کے بعد فلموں اور ڈراموں کی پروڈکشن شروع کردی تھی جب کہ اب میگھن مارکل نے اپنا پوڈ کاسٹ شو بھی شروع کردیا ہے، جسے ’اسپاٹی فائے‘ پر نشر کیا جاتا ہے۔