نمیبیا نے مقررہ 20 اوورز میں 7 وکٹوں کے نقصان پر 163 رنز بنائے اور جیت کے لیے 164 رنز کا ہدف دیا۔

مڈل آرڈر بلے باز جان فرائلنک اور جے جے سمٹ نے شاندار بیٹنگ کا مظاہرہ کیا۔

جان فرائلنک 44 رنز بناکر آؤٹ ہوئے جب کہ جے جے سمٹ نے ناقابل شکست31 رنز کی اننگز کھیلی۔

ہدف کے تعاقب میں سری لنکا کی ٹیم ابتدا سے ہی مشکلات کا شکار نظر آئی، پے درپے اس کی وکٹیں گرتی رہیں اور پوری ٹیم 19ویں اوور میں 108 رنز پر آؤٹ ہوگئی۔

اس طرح یہ میچ نیمیبیا نے 55 رنز سے جیت کر میگا ایونٹ میں پہلا اپ سیٹ کردیا۔

آئی سی سی مینز ٹی 20 ورلڈ کپ کے پہلے مرحلے کے افتتاحی میچ میں سری لنکا نے نمیبیا کے خلاف ٹاس جیت کر فیلڈنگ کا فیصلہ کیا تھا۔

آسٹریلیا کے شہر جی لانگ کے کارڈینیا پارک اسٹیڈیم میں آج 2 میچز کھیلے جائیں گے جہاں پہلے میچ میں نمیبیا اور سری لنکا کی ٹیمیں آمنے سامنے تھے۔

سری لنکن ٹیم کی قیادت داسن شنکا کر رہے تھے جب کہ نمیبیا کے کپتان جیرہارڈ ایراسمس تھے۔

آج کھیلے جانے والے دوسرے میچ میں متحدہ عرب امارات اور نیدرلینڈز کی ٹیمیں مد مقابل ہوں گی۔

یہ بھی پڑھیں: پاک-بھارت کرکٹ پر چھائے بادل ختم کرنے کیلئے مختصر گفتگو

ٹی20 ورلڈ کپ کے پہلے مرحلے میں کوالیفائنگ میچز کھیلے جارہے ہیں، مین گراؤنڈ کے لیے مجموعی طور پر 12 ٹیموں کو 2 گروپس میں تقسیم کیا گیا ہے۔

پہلے مرحلے کے اختتام پر 4 ٹیمیں مین راؤنڈ کے لیے کوالیفائی کریں گی، مین راؤنڈ کا آغاز 22 اکتوبر سے ہوگا۔

آئی سی سی ٹی 20 ورلڈ کپ سے قبل تمام کپتانوں کا گروپ فوٹو شوٹ کیا گیا، قومی کپتان بابر اعظم نے دیگر ٹیموں کے کپتانوں کے ہمرا اپنی سالگرہ کا کیک بھی کاٹا۔

ایونٹ میں میزبان آسٹریلوی ٹیم اپنے اعزاز کا دفاع کرے گی، پاکستان ٹی20 ورلڈ کپ میں اپنی مہم 23 اکتوبر کو ملبورن میں روایتی حریف بھارت کے خلاف شروع کرے گا۔

خیال رہے کہ پاکستان کرکٹ بورڈ نے بابر اعظم کی قیادت میں ٹی20 ورلڈ کپ کے لیے 15 رکنی اسکواڈ کا اعلان گزشتہ ماہ کردیا تھا۔

ٹی20 ورلڈ کپ کے لیے اعلان کردہ قومی اسکواڈ میں شامل کھلاڑی یہ ہیں:

بابر اعظم (کپتان)، شاداب خان، آصف علی، فخر زمان، حیدر علی، حارث رؤف، افتخار احمد، خوشدل شاہ، محمد حسنین، محمد نواز، محمد رضوان، محمد وسیم جونیئر، نسیم شاہ، شاہین شاہ آفریدی، شان مسعود۔

پاکستان کرکٹ ٹیم کے تجربہ کار بلے باز فخر زمان انجری سے صحت یابی کے بعد ٹی20 ورلڈ کپ کے اسکواڈ میں شامل کیے گئے جب کہ لیگ اسپنر عثمان قادر انجری کے باعث ریزرو کے طور پر ٹیم کا حصہ ہیں۔

مزید پڑھیں: عثمان قادر کی جگہ فخر زمان ٹی20 ورلڈ کپ اسکواڈ میں شامل

فخر زمان کو ابتدائی طور پر انجری کے باعث ٹی20 ورلڈ کپ کے اسکواڈ میں ریزرو کھلاڑی کے طور منتخب کیا گیا تھا۔