صبا فیصل نے ایک دن قبل مختصر ویڈیو میں بہو نیہا ملک پر سنگین الزامات عائد کرتے ہوئے ان سے اور بیٹے اداکار سلمان فیصل سے لاتعلقی کا اظہار کیا تھا۔

صبا فیصل نے واضح کیا تھا کہ اب ان کا اور پورے خاندان کا ان کے بیٹے سلمان سے کوئی تعلق نہیں۔

صبا فیصل نے بہو نیہا ملک پر سنگین الزامات عائد کرتےہوئے کہا تھا کہ جس بھی گھر میں نیہا ملک جیسی عورت جاتی ہے تو وہ گھر جہنم بن جاتا ہے۔

مختصر دورانیے کی ویڈیو میں اگرچہ صبا فیصل نے بہو پر الزام لگایا تھا کہ ان جیسی خواتین گھروں کو جہنم بناتی ہیں، تاہم انہوں نے اپنی بہو کی جانب سے اٹھائے گئے اقدامات کی تفصیلات نہیں بتائی تھی۔

اور اب انہوں نے ایک اور ویڈیو جاری کرتے ہوئے لوگوں سے اپیل کی ہے کہ وہ ان کی بہو اور ان کے خلاف غلط باتیں نہ کریں۔

صبا فیصل نے انسٹاگرام پر ویڈیو شیئر کرتے ہوئے ان تمام افراد کا بھی شکریہ ادا کیا، جنہوں نے ان کی حمایت کی اور انہیں دعائیں دیں۔

اداکارہ نے حمایت کرنے والے سوشل میڈیا پیجز کا بھی شکریہ ادا کیا، تاہم ساتھ ہی لوگوں سے اپیل کی کہ اب وہ ان کی پوسٹس پر مزید کمنٹس نہ کریں، نہ ان کے خلاف کوئی بات کریں اور نہ ہی ان کی بہو کے حوالے سے غلط باتیں کی جائیں۔

انہوں نے کہا کہ انہوں نے چار سال تک دکھ اور درد کو بیان کیا اور انہوں نے اپنی شہرت، عزت اور دولت کی قیمت چکائی۔

صبا فیصل کا کہنا تھا کہ عام لوگوں کو یہ سمجھنا چاہیے کہ شہرت، دولت اور عزت کمانے والے اداکاروں کی زندگی اور گھروں کی بھی ڈارک سائیڈس ہوتی ہیں۔

انہوں نے کہا کہ انہوں نے چار سال تک بہو کا مسئلہ برداشت کرکے ایک طرح سے دولت، عزت اور شہرت کی قیمت ادا کی۔

انہوں نے لوگوں سے اپیل کی کہ وہ ان کے خاندانی مسائل کو سمجھیں اور ان کی بہو سمیت ان کے حوالے سے غلط باتیں نہ کریں اور وہ ان سے متعلق قیاس آرائیاں کرنا بند کریں۔

صبا فیصل کی جانب سے دوسری ویڈیو جاری کیے جانے کے باوجود تاحال ان کی بہو نیہا ملک نے واضح طور پر کوئی بیان جاری نہیں کیا۔

صبا فیصل کی جانب سے بہو پر الزامات کا یہ سلسلہ ایک ایسے وقت میں سامنے آیا ہے جب کہ کئی ماہ سے ان کے بیٹے اور بہو کے درمیان اختلافات کی خبریں وقتاً فوقتاً سوشل میڈیا پر گردش کرتی آئی تھیں۔

گزشتہ سال کے آغاز اور وسط میں صبا فیصل کے بیٹے اور بہو کے درمیان طلاق کی خبریں پھیلی تھیں، جس پر اداکارہ نے وضاحت کرتے ہوئے ایسی خبروں کو جھوٹا قرار دیا تھا۔

بعد ازاں سلمان فیصل اور نیہا ملک نے بھی طلاق کی خبروں کو مسترد کردیا تھا اور جوڑے کے ہاں نومبر 2021 میں بیٹے کی پیدائش ہوئی تھی، جس کے بعد ان کے درمیان اختلافات کی خبریں ختم ہوگئی تھیں۔

نیہا ملک اور سلمان فیصل نے 2019 میں شادی کی تھی اور انہیں ایک ہی بیٹا روحان سلمان فیصل ہے۔