ڈان اخبار کی رپورٹ کے مطابق یہ قانون ساز اسمبلی میں لاہور ہائی کورٹ (ایل ایچ سی) کی جانب سے پی ٹی آئی کے 43 قانون سازوں کے استعفے قبول کرنے کے اسپیکر کے فیصلے اور الیکشن کمیشن آف پاکستان (ای سی پی) کی جانب سے انہیں ڈی نوٹیفائی کرنے کے اقدام کو معطل کرنے کے ایک روز بعد اسمبلی پہنچے تھے۔

بحال ہونے والے کچھ ارکان اسمبلی جمعرات کو اجلاس میں شرکت کے لیے پہنچے لیکن انہیں قومی اسمبلی کے ہال کے اندر جانے کی اجازت نہیں دی گئی۔

جب پی ٹی آئی اراکین اسمبلی ہال کے دروازے پر تھے اسی سے چند لمحے قبل جماعت اسلامی کے مولانا عبدالاکبر چترالی کی طرف سے کورم کی کمی کی نشاندہی کے بعد ڈپٹی اسپیکر زاہد اکرم درانی نے ایوان کی کارروائی ملتوی کردی۔

دریں اثنا قومی اسمبلی کے اسپیکر راجا پرویز اشرف نے کہا کہ اسمبلی سیکریٹریٹ کو فیصلے کی نقل موصول نہیں ہوئی۔

ایک ویڈیو پیغام میں اسپیکر نے کہا کہ انہوں نے عدالتی حکم نامہ نہیں پڑھا اور وہ اس کے مندرجات سے لاعلم ہیں۔

ان کا کہنا تھا کہ مجھے یقین ہے کہ ہمارے پاس فیصلہ آنے کے بعد ہم اسے پڑھیں گے اور اپنے وکلاء اور ماہرین سے مشورہ کر کے پھر آگے کا راستہ طے کریں گے۔

انہوں نے یہ بھی کہا کہ حکومت کو کیس میں فریق بنایا گیا تھا لیکن اسے کوئی نوٹس نہیں ملا اور اس کا علم ٹی وی رپورٹس سے ہوا۔

قومی اسمبلی سیکریٹریٹ کے باہر صحافیوں سے گفتگو کرتے ہوئے سینیٹ میں اپوزیشن لیڈر شہزاد وسیم نے کہا کہ اسپیکر عدالتی احکامات کا احترام کرنے کے پابند ہیں۔

ہائی کورٹ نے واضح طور پر کہا ہے کہ اسپیکر کی جانب سے استعفوں کی منظوری غیر قانونی ہے، انہوں نے زور دے کر کہا کہ پی ٹی آئی کے اراکین اسمبلی آج پارلیمنٹ میں داخل ہوں گے۔

شہزاد وسیم نے مزید کہا کہ انشا اللہ ہمارے پاس اپنا اپوزیشن لیڈر ہوگا۔