فرحان سعید نے پیٹرول اور ڈیزل کی بڑھتے ہوئے نرخ پر شدید ردِعمل دیتے ہوئے پاکستانی قوم سے ناراضی کا اظہار کیا ہے۔

اداکار نے ٹوئٹ کرتے ہوئے کہا کہ ’ افسوس ہے کہ پاکستانی عوام 500 روپے لیٹر پیٹرول بھی ڈلوا لیں گے۔’

انہوں نے مزید کہا کہ ’جو قوم اپنے حق کے لیے کھڑی نہ ہو وہ یہ اور اس سے مزید بُرے کی حق دار ہے‘۔

یاد رہے کہ گزشتہ روز پیٹرول 22 روپے 22 پیسے کے اضافے کے ساتھ 272 روپے فی لیٹر جبکہ ہائی اسپیڈ ڈیزل کی قیمت 17.20 روپےاضافے کے ساتھ 262.80 روپے سے بڑھا کر 280 روپے فی لیٹر کر دیا گیا۔

فرحان سعید کی ٹوئٹ پر ٹوئٹر صارفین نے بھی ردِعمل دیتے ہوئے کہا کہ ہماری قوم کے نوجوان 272 روپے فی لیٹر پیٹرول ڈلوا کر دھکے کھاتے ہوئے پی ایس ایل میچ دیکھنے کے لیے اسٹیڈیم پہنچنے میں مصروف ہے۔

فرحان سعید کے علاوہ دیگر اداکاروں نے بھی پیٹرول کی قیمتوں میں اضافے پر شدید ردعمل دیا۔

اداکارہ سمینہ پیر زادہ نے لکھا کہ پاکستان کی ترقی میں ہی سب کی ترقی ہے، بس کردو ظالمو، دھرتی ماں کو جینے دو پھلنے پھولنے دو، لوگوں کو سانس لینے دو’۔

مشی خان نے عوام پر طنز کرتے ہوئے لکھا کہ پیٹرول کے لیے اب بھی لمبی قطاریں ہوں گی، ٹم ہارٹن کو مت بھولیں، پی ایس ایل کے آٹھویں ایڈیشن کو انجوائے کریں، اس قوم پر کوئی اثر نہیں ہوگا، ایک اور مہنگائی بم پھٹنے کا انتظار کریں اور عوام صرف 2 دن تک سوشل میڈیا پر صرف باتیں کرتی رہیں گے’۔