مرکزی رویت ہلال کمیٹی کا اجلاس چیئرمین مولانا عبدالخبیر آزاد کی زیر صدارت دارالحکومت اسلام آباد میں منعقدہ اجلاس کے بعد کیا گیا، زونل اور ضلعی رویت ہلال کمیٹیوں کے اجلاس بھی ان کے متعلقہ ہیڈ کوارٹرز کراچی، لاہور، پشاور اور کوئٹہ میں منعقد ہوئے۔

ملک بھر میں کہیں سے بھی چاند کی رویت کی شہادت موصول نہیں ہوئی جس کے بعد چیئرمین مرکزی رویت ہلال کمیٹی اسلام آباد میں پریس کانفرنس کرتے ہوئے چاند نظر نہ آنے کا اعلان کیا۔

پریس کانفرنس کے دوران مولانا عبدالخبیر آزاد نے کہا کہ بیشتر علاقوں میں مطلع صاف ہے لیکن کچھ علاقوں میں ابر آلود ہے، کسی علاقے سے چاند نظر آنے کی شہادتیں موصول نہیں ہوئیں، اس لیے ملک بھر میں عیدالفطر ہفتہ کو ہوگی۔

انہوں نے کہا کہ متفقہ طور پر فیصلہ کیا گیا کہ یکم شوال 1444 ہجری، 22 اپریل کو ہوگی۔

رویت ہلال کمیٹی کے اس اعلان کے کچھ دیر بعد وزارت مذہبی امور نے ایک نوٹیفکیشن جاری کرتے ہوئے کہا کہ ماہ شوال 1444 ہجری ہفتہ کے روز سے شروع ہوگا۔

مفتی شہاب الدین پوپلزئی کا بھی عید الفطر ہفتے کو منانے کا اعلان

پشاور کی مقامی غیر سرکاری رویت ہلال کمیٹی کے سربراہ مفتی پوپلزئی نے بھی 22 اپریل کو عید منانے کا اعلان کردیا۔

پشاور کی مسجد قاسم علی خان میں مفتی پوپلزئی کی زیر صدارت غیر سرکاری مقامی رویت ہلال کمیٹی کا اجلاس ہوا، اجلاس کے بعد مفتی شہاب الدین پوپلزئی نے اعلان کیا کہ شوال کا چاند نظر نہیں آیا، 22 اپریل بروز ہفتہ عید الفطر ہوگی۔

قبل ازیں محکمہ موسمیات پاکستان (پی ایم ڈی) نے چاند نظر آنے کے حوالے سے پیش کرتے ہوئے کہا کہ 20 اپریل 2023 کی شام یعنی 29 رمضان المبارک 1444 ہجری کو شوال کا چاند نظر آنے کا کوئی امکان نہیں ہے۔

محکمہ موسمیات نے مزید کہا تھا کہ موسمیاتی ریکارڈ کے مطابق ملک کے بیشتر حصوں میں موسم صاف/جزوی ابر آلود رہنے کی توقع ہے۔

سعودی عرب، قطر، یو اے ای میں شوال کا چاند نظر آگیا، عیدالفطر کل ہوگی

سعودی عرب، قطر اور متحدہ عرب امارات میں میں شوال کا چاند نظر آگیا ہے جہاں عیدالفطر جمعے (21 اپریل) کو ہو گی۔

العربیہ اردو کے مطابق سعودی سپریم کورٹ نے مملکت میں شوال کے چاند نظر آنے کی تصدیق کی اور اعلان کیا کہ عیدالفطر جمعہ 21 اپریل سے شروع ہو گی۔

مطابق متحدہ عرب امارات میں شوال کا چاند نظر آنے کے بعد عیدالفطر کل (جمعے) کو ہوگی۔

خلیج ٹائمز کی رپورٹ کے متحدہ عرب امارات میں شوال کا چاند نظر آگیا ہے جہاں کل عید منائی جائے گی جبکہ تعلیمی ادارے اور دیگر دفاتر 24 اپریل کو کھولے جائیں گے۔

تاہم اومان میں عیدالفطر 22 اپریل (ہفتہ) کو منائی جائے گی۔

خلیج ٹائمز کی رپورٹ کے مطابق اومان میں شوال کا چاند نظر نہیں آیا جس کی وجہ سے عیدالفطر 22 اپریل کو کرنے کا اعلان کیا گیا ہے۔

اسی طرح بھارت میں بھی شوال کا چاند نظر نہ آنے کے بعد عیدالفطر 22 اپریل کو ہوگی۔

جنوب مشرقی ایشیا اور آسٹریلیا کے سات ممالک بشمول آسٹریلیا، انڈونیشیا، جاپان، ملائیشیا، سنگاپور، سلطنت برونائی، اور تھائی لینڈ نے کہا ہے کہ عیدالفطر 22 اپریل کو ہوگی۔

نیو عرب ڈاٹ کام کے مطابق بین الاقوامی فلکیات مرکز نے کہا ساتوں ممالک میں حکام چاند نظر آنے کی تصدیق نہیں کر سکے جس کی وجہ سے عیدالفطر 22 اپریل کو ہوگی۔

عید الفطر اسلامی کیلنڈر میں ایک اہم تہوار ہے، جو رمضان کے مقدس مہینے کے اختتام پر منایا جاتا ہے۔

پوری دنیا کے مسلمان ایک مہینہ روزے رکھتے ہیں جس کے بعد عید کی تقریبات خود پر عائد کردہ پابندیوں کے خاتمے کی نشاندہی کرتی ہیں۔

رواں سال پاکستان میں عیدالفطر 22 اپریل کو ہوگی جب کہ حکومت نے پہلے ہی 21 اپریل سے 25 اپریل تک عید کی پانچ روزہ تعطیلات کا اعلان کردیا ہے۔