امیتابھ بچن نے ایک روز قبل انسٹاگرام پر ایک ویڈیو شیئر کی، جس میں ایک بچے کو کمرے میں شاندار انداز میں کرکٹ شاٹ لگاتے ہوئے دیکھا جا سکتا ہے۔

امیتابھ بچن نے بچے کی ویڈیو شیئر کرتے ہوئے کیپشن میں لکھا کہ بھارتی کرکٹ مضبوط ہاتھوں میں ہے۔

اگرچہ انہوں نے بچے سے متعلق یہ نہیں لکھا کہ وہ بھارتی ہے لیکن انہوں نے کیپشن سے تاثر دیا کہ وہ بھارتی ہی ہے اور بھارت کی کرکٹ محفوظ ہاتھوں میں ہے۔

ان کی جانب سے ویڈیو کو شیئر کیے جانے کے بعد متعدد بھارتی شوبز شخصیات نے بھی بچے کی تعریفیں کرنا شروع کردیں اور اس بات پر شکر ادا کیا کہ بھارتی کرکٹ ٹیم محفوظ ہاتھوں میں ہے۔

علاوہ ازیں ہزاروں فالوورز نے بھی کمنٹس کرتے ہوئے بچے کو مستقبل کا ویرات کوہلی اور سچن ٹنڈولکر قرار دیا۔

تاہم امیتابھ بچن کی ہی پوسٹ پر پاکستانی اداکار گوہر ممتاز اور گلوکار عاصم اظہر نے کمنٹس کرکے بولی وڈ بگ بی کو بتایا کہ دراصل مذکورہ بچہ بھارتی نہیں بلکہ پاکستانی ہے۔

دونوں شوبز شخصیات نے امیتابھ بچن کی تعریفیں کرتے ہوئے لکھا کہ پاکستان میں ان کے بہت سارے مداح ہیں لیکن مذکورہ بچہ پاکستانی ہے۔

ساتھ ہی دونوں شخصیات نے امید ظاہر کی کہ مستقبل میں دونوں ممالک کی کرکٹ ٹیمیں کھیل کر دونوں ممالک کا مستقبل بہتر بنائیں گی۔

پاکستانی شوبز شخصیات کی تصحیح کے بعد بعض بھارتی سوشل میڈیا صارفین نے بھی تسلیم کیا کہ مذکورہ بچہ واقعی میں پاکستانی ہے۔

امیتابھ بچن کی پوسٹ پر ہی سندھ سے تعلق رکھنے والے بعض سوشل میڈیا صارفین نے کمنٹس کرتے ہوئے لکھا کہ ویڈیو میں نظر آنے والا بچہ پاکستان کے صوبہ سندھ سے تعلق رکھتا ہے۔

بولی وڈ بگ بی نے جس بچے کی ویڈیو شیئر کی، دراصل وہ ضلع گھوٹکی سے تعلق رکھتا ہے اور ان کی کرکٹ کھیلنے کی ویڈیوز ان کے چچا انسٹاگرام پر شیئر کرتے رہتے ہیں۔

بچے کے چچا رضا مہر نے ان کی متعدد ویڈیوز انسٹاگرام پر شیئر کر رکھی ہیں اور امیتابھ بچن کی جانب سے شئیر کی جانے والی ویڈیو کو ابتدائی طور پر انہوں نے رواں برس اپریل میں شیئر کیا تھا۔

مذکورہ ویڈیو پاکستانی سوشل میڈیا پر بھی خوب وائرل ہوگئی تھی جب کہ سندھی زبان کے نشریاتی اداروں نے اس پر خبریں بھی شائع کی تھیں۔

رضا مہر کی جانب سے اپنے بھتیجے کی مذکورہ ویڈیو کے علاوہ متعدد ویڈیوز شیئر کی جا چکی ہیں، جن میں بچے کو انتہائی پیشہ ورانہ انداز میں کرکٹ کھیلتے ہوئے دیکھا جا سکتا ہے۔

رضا مہر کی جانب سے اپنے بھتیجے کی شیئر کی گئی کرکٹ کھیلنے کی ویڈیوز کی خاص بات یہ ہے کہ ان کی زیادہ ویڈیوز کے بیک گراؤنڈ میں بولی وڈ گانے یا دیگر بھارتی گانوں اور شعروں کی آواز سنائی دیتی ہے۔

مذکورہ بچے کی بعض ویڈیوز میں بیک گراؤنڈ میں امیتابھ بچن کی شاعری پڑھنے کی آواز بھی شامل ہے۔