انوشے اشرف کچھ ہفتوں سے سیر سپاٹے کرتی دکھائی دیتی ہیں، انہوں نے مشرق وسطیٰ کے ملک اردن میں سیاحت کرنے کے دوران اپنی ویڈیوز اور تصاویر شیئر کیں، جس کے بعد اب انہوں نے خواتین کو 10 نصیحتیں کرتے ہوئے لکھا کہ یہ سب چیزیں خواتین کو کرنی چاہئیں۔

انوشے اشرف نے انسٹاگرام پر خواتین کے لیے نصیحتیں شیئر کرتے ہوئے لکھا کہ وہ مصروف رہتی ہیں لیکن انہوں نے وقت نکال کر خواتین کی بہتری کے لیے کچھ تجاویز لکھی ہیں، جن پر عمل کرکے لڑکیاں اپنی زندگی کو بہتر بنا سکتی ہیں۔

انوشے اشرف کی جانب سے کی گئی نصیحتیں درج ذیل ہیں

1- مالی طور پر خود مختار بنیں

انوشے اشرف نے خواتین کو تجویز دی کہ وہ سب سے پہلے مالی طور پر خود مختار اور مستحکم بنیں، کیوں کہ پیسا انہیں وہ عزت اور مقام دے سکتا ہے جو عام طور پر خاتون کو سماج میں نہیں ملتا۔

پیسہ خواتین کو سیر و سیاحت اور زندگی کو اپنی مرضی کے مطابق گزارنے کی سہولت فراہم کرتا ہے۔

2- اپنی ذات کے لیے کھڑی ہوجائیں

انہوں نے خواتین کو مشورہ دیا کہ خواتین کو ہمیشہ صبر کرو اور برداشت کرو کا مشورہ دیا جاتا ہے لیکن اب وقت آگیا ہے کہ ہر خاتون اپنے لیے کھڑی ہو اور وہ اپنے ساتھ جذباتی بدسلوکی سمیت ہر طرح کے ستم کے لیے آواز اٹھائے اور اپنی حفاظت خود کرے۔

3- تنہا یا دوستوں کے ساتھ سیاحت کریں

انوشے اشرف نے خواتین کو سمجھایا کہ سیر سپاٹے کے لیے انہیں کسی مرد ساتھی کی کوئی ضرورت نہیں۔

اداکارہ نے لکھا کہ خواتین کو تنہا بھی سیاحت کرنی چاہیے اور اگر وہ چاہیں تو اپنی کسی خاتون دوست کو ساتھ لے کر بیرون ممالک کا سفر کریں، کیوں کہ سفر سب سے بڑی تعلیم ہوتی ہے، اس سے آپ کو سیکھنے کا موقع ملے گا۔

4- ڈرائیونگ سیکھیں

ماڈل و میزبان نے خواتین کو یہ تجویز بھی دی کہ وہ گاڑی چلانا سیکھیں، کیوں کہ ڈرائیونگ انسان کو کنٹرول کرنا سکھاتی ہے اور یہ کہ اس سے خواتین کسی ہنگامی صورت حال میں کسی دوسرے کی محتاج نہیں رہیں گی۔

5- لڑکوں سے خود اظہار محبت کریں

انوشے اشرف نے خواتین اور خصوصی طور پر نوجوان لڑکیوں کو مشورہ دیا کہ اب نیا زمانہ ہے، اگر وہ کسی سے محبت کرتی ہیں تو وہ ایک قدم آگے بڑھ کر خود اظہار محبت کریں، وہ کسی کی جانب سے اظہار کرنے کا انتظار نہ کریں۔

انہوں نے لکھا کہ یہ 2023 کا زمانہ ہے اور لڑکیوں کو اس شخص سے خود بھی اظہار محبت کرنا چاہیے، جسے وہ چاہتی ہوں۔

6- مشاغل کا تعین کریں

انہوں نے خواتین کو یہ تجویز بھی دی کہ مصروف زندگی کے اس دور میں وہ اپنی ذات اور ذہنی سکون کے لیے مشاغل کا انتخاب کریں، وہ خود کو اپنے پسندیدہ آرٹ، ادب، فلموں، ڈراموں اور موسیقی سمیت دیگر مشاغل میں مصروف رکھیں۔

7- اپنی جسامت اور رنگت سے مطمئن رہیں

انوشے اشرف نے خواتین کو اہم مشورہ دیتے ہوئے انہیں بتایا کہ وہ اپنی جسامت اور رنگت کے حوالے سے پریشان رہنے کے بجائے اس پر مطمئن رہیں، وہ جیسی ہیں، ویسی ہی خود کو قبول کرکے زندگی کو انجوائے کریں۔

انہوں نے خواتین کو مشورہ دیا کہ وہ خود کو زائد الوزن، پتلی، سانولی اور گوری رنگت سمیت ہر طرح کی جسامت اور رنگت میں قبول کرکے اس پر فخر کریں۔

8- سنگل رہنے پر 100 فیصد پر سکون رہیں

اداکارہ نے خواتین کو تجویز دی کہ سنگل رہنے کو آپشن کی کمی تصور نہ کریں بلکہ اسے اپنا انتخاب سمجھ کر قبول کریں اور زندگی کو بہتر طریقے سے گزارنے کے لیے اپنے تنہا ہونے کو قبول کرکے آگے بڑھیں۔

9- اپنے مقاصد کو پورا کریں

انوشے اشرف نے خواتین کو یہ تجویز بھی دی کہ وہ ایک مقصد کے تحت زندگی گزاریں، یعنی وہ کسی ایک مقصد کا انتخاب کریں، چاہے وہ تعلیم، صحت، جانوروں کی فلاح، مذہب اور ماحولیات کی بہتری کا مقصد کیوں نہ ہو اور پھر اس مقصد کو پورا کرنے کے لیے اس پر وقت کی سرمایہ کاری کریں۔

10- ہفتے میں تین بار ورزش کریں

ماڈل و اداکارہ نے خواتین پر جسمانی و ذہنی صحت کا زیادہ سے زیادہ خیال رکھنے پر زور دیتے ہوئے انہیں تجویز دی کہ وہ ورزش کو معمول بنائیں اور ہفتے میں تین بار مخصوص وقت کے لیے ورزش کو معمول بنائیں۔

انہوں نے لکھا کہ ورزش نہ صرف جسمانی اور ذہنی صحت کے لیے فائدہ مند ہوتی ہے بلکہ یہ خوبصورتی بڑھانے سمیت جوان رکھنے اور پھر موذی امراض سے بچانے میں بھی مددگار ہوتی ہے۔