بھارتی اخبار ’ہندوستان ٹائمز‘ کی رپورٹ کے مطابق نیوز ایجنسی ’اے این آئی‘ نے بتایا کہ اداکار کی موت بھارتی ریاست مہاراشٹرا کے شہر ناشیک میں ہوئی جہاں وہ ایک ہوٹل کے کمرے میں قیام کر رہے تھے۔

ابتدائی معلومات کے مطابق نتیش پانڈے کی موت دل کا دورہ پڑنے کے سبب ہوئی ہے۔

اداکار کی موت کی اطلاع ملنے پر پولیس ہوٹل پہنچی جہاں ہوٹل انتظامیہ اور اداکار کے قریبی دوستوں سے پوچھ گچھ کی گئی، تاہم پولیس کو لاش کی پوسٹ مارٹم رپورٹ آنے کا انتظار ہے۔

اداکار کی اچانک موت پر ساتھی اداکار غم سے نڈھال ہیں اور سوشل میڈیا پر پیغامات جاری کر رہے ہیں۔

بھارت کے نامور فلم ساز ہنسل مہتا نے ٹوئٹ کرتے ہوئے کہا کہ ’تین نوجوان اداکار حال ہی میں 3 سے 4 روز کے دوران انتقال کرگئے ہیں، یہ انتہائی بُرا وقت ہے‘۔

مزاحیہ طبیعت کے مالک بھارتی اداکار نتیش پانڈے نے بھارت کی کئی مقبول فلموں میں کام کیا، انہوں نے 90 کی دہائی میں بطور تھیٹر اداکار کے طور پر اپنے کرئیر کا آغاز کیا تھا۔

انہوں نے مختصر ٹی وی پروگرام ’ایک پریم کہانی‘، ’منزلیں اپنی اپنی‘، ’سایہ‘، جستجو’ بھی کام کیا۔

اس کے علاوہ بولی ووڈ کی مقبول فلموں میں بھی اپنی اداکاری کے جوہر دکھائے جن میں ’بدھائی ہو‘، ’شادی کے سائیڈ افیکٹ‘، ’ رنگون’ اور شاہ رخ خان کی مقبول فلم ’اوم شانتی اوم‘ بھی شامل ہیں۔

یہی نہیں بلکہ انہوں نے سلمان خان کی فلم ’دبنگ 2‘ اور عرفان خان کی فلم ’مداری‘ میں بھی اداکاری کی تھی۔