ڈان اخبار کی رپورٹ کے مطابق انہوں نے کہا کہ پاکستان کے عوام معاشی مشکلات کی وجہ سے مایوسی کا شکار ہیں اور ملک کے ان مسائل کا حل صرف استحکام پاکستان پارٹی کے پاس ہے۔

اس کے ساتھ ہی انہوں نے دعویٰ کیا کہ پی ٹی آئی کے سربراہ عمران خان نے خود کو ایم کیو ایم کے بانی الطاف حسین کو درپیش صورتحال سے دوچار کردیا، سابق وزیر اعظم اس صورتحال میں صرف اس لیے پھنسے کہ انہوں نے ان موقع پرست لوگوں کے مشورے پر عمل کیا جنہوں نے انہیں گھیر رکھا تھا۔

فردوس عاشق اعوان نے کہا کہ ملک پر مایوسی اور معاشی بدحالی کے سیاہ بادل منڈلا رہے ہیں اور استحکام پاکستان پارٹی شہریوں کے لیے امید کی کرن بن کر سامنے آئی ہے۔

انہوں نے اس بات پر روشنی ڈالی کہ استحکام پاکستان پارٹی روشن مستقبل کو یقینی بنانے اور ملک کو معاشی بحرانوں سے نکالنے کے لیے نوجوانوں کی ترقی کے لیے روڈ میپ تیار کرے گی۔

انہوں نے ملک میں کئی اصلاحات کی فوری ضرورت پر زور دیتے ہوئے کہا کہ معاشی، قانونی اور انتخابی اصلاحات کسی بھی ملک کی ترقی کے لیے ناگزیر ہیں۔

انہوں نے زور دے کر کہا کہ ڈیجیٹل پاکستان کا نظریہ اصلاحاتی ایجنڈے کو عملی جامہ پہنانے میں اہم کردار ادا کرے گا۔

ڈاکٹر فردوس عاشق اعوان نے کہا کہ خراب معاشی صورتحال کے باعث ملک کی سلامتی کو سنگین خطرہ لاحق ہے اور اس چیلنج پر کامیابی سے قابو پانے کے لیے خواتین کو بااختیار بنانا بہت ضروری ہے، انہوں سوال اٹھایا کہ کوئی قوم اپنی آدھی فوج کے بغیر کیسے جنگ جیت سکتی ہے؟ .