میزبان ٹیم ویسٹ انڈیز دوسری اننگز میں 130 رنز پر ڈھیر ہوگئی، بھارت نے 2 میچوں کی سیریز میں 0-1 کی برتری حاصل کرلی۔

روہت شرما کی کپتانی میں کھیلنے والی ٹیم نے تین دن کے اندر فتح حاصل کرلی، بائیں ہاتھ کے 21 سالہ بیٹر یشسوی جیسوال کو پلیئر آف دی میچ کا ایوارڈ دیا گیا انہوں نے اپنے ڈیبیو ٹیسٹ میں 171 رنز بنائے تھے، بھارت نے 5 وکٹوں کے نقصان پر 421 رنز بنا کر اننگز ڈکلیئر کر دی تھی۔

ویسٹ انڈیز کو دوسری اننگز میں 271 رنز خسارے کا سامنا تھا، کریگ بریتھویٹ کی ٹیم کسی بھی مرحلے پر مہمان ٹیم کو دوبارہ بیٹنگ پر مجبور کرتی دکھائی نہیں دی، روی چندرن ایشون نے پہلی اننگز سے ہی اپنی بولنگ فارم کو جاری رکھا۔

پہلی گرنے والی وکٹ ٹیگنارائن چندر پال کی تھی، جو 8 رنز بنا کر رویندرا جدیجا کے گیند پر ایل بی ڈبلیو ہو گئے، اس سے بعد 22 رنز کے مجموعے پر روی چندرن ایشون نے دوسری اننگز میں پنا پہلا شکار کیا ، جب انہوں نے کریگ بریتھویٹ کو اجنکیا رہانے کے ہاتھوں کیچ آؤٹ کرایا۔

روی چندرن ایشون نے پہلی اننگز میں بھی 60 رنز کے عوض 5 وکٹیں حاصل کی تھیں جبکہ انہوں نے دوسری اننگز میں 71 رنز دے کر 7 وکٹیں اپنے نام کیں، ویسٹ انڈیز کے ایلک ایتھنیز 28 رنز بنا کر سب سے کامیاب بیٹر رہے۔

جومل واریکن کی وکٹ گرنے والی آخری وکٹ تھی جب وہ ایل بی ڈبلیو ہو گئے، روی چندرن ایشون کی عمدہ باؤلنگ کے سبب 2 دن قبل ہی بھارت نے با آسانی فتح سمیٹ لی۔

ٹیمیں 20 جولائی سے پورٹ آف اسپین میں سیریز کے دوسرے اور آخری ٹیسٹ میں دوبارہ آمنے سامنے ہوں گی، اس کے بعد 3 ون ڈے انٹرنیشنل اور 5 ٹی 20 میچز کی سریز کھیلی جائے گی۔