ڈان اخبار کی رپورٹ کے مطابق اتر پردیش سمیت شمالی بھارت میں غیر معمولی طور پر شدید بارشوں کے بعد گزشتہ چند روز کے دوران دریائے جمنا میں پانی کی سطح میں اضافہ ہوا ہے، یکم جون سے شروع ہونے والے 4 ماہ تک کے مون سون سیزن کے دوران اب تک معمول سے 108 فیصد زیادہ بارشیں ہوچکی ہیں۔

بھارت کے سینٹرل واٹر کمیشن (سی ڈبلیو سی) کے مطابق تاج محل کے ساتھ بہنے والے دریا کی سطح منگل کی شام تک 152 میٹر تک بڑھ گئی، یہ سطح 151.4 میٹر کے ممکنہ خطرے کے وارننگ لیول سے کافی اوپر ہے، خطرناک سمجھی جانے والی سطح 152.4 میٹر ہے۔

مقامی ذرائع ابلاغ نے رپورٹ کیا کہ آخری بار دریا تاج محل کی دیواروں تک 45 برس قبل 1978 میں پہنچا تھا۔

منگل کے روز علاقے کے مناظر میں تاج محل کی دیوار کو پانی سے گھرا دیکھا گیا۔

تاج محل کے ساتھ ساتھ ملک میں کئی دیگر یادگاروں کی نگرانی کرنے والے بھارت کے محکمہ آثار قدیمہ سروے (اے ایس آئی) کے عہدیداروں نے کہا کہ فی الحال یادگار کے بارے میں کوئی سنجیدہ تشویش نہیں ہے۔

اے ایس آئی کے سپرنٹنڈنٹ آرکولوجسٹ راج کمار پٹیل نے کہا کہ اگر مزید بارش ہوتی ہے یا پانی کی سطح مزید کچھ روز تک اتنا ہی بلند رہتی ہے تو ہمیں صورتحال کا دوبارہ جائزہ لینے کی ضرورت ہوگی۔

انہوں نے کہا کہ دریائے جمنا کے کنارے تاج محل کے قرب و جوار میں واقع کئی دیگر یادگاریں اور باغات پانی میں ڈوب چکے ہیں اور انہیں نقصان پہنچا ہے۔