ڈان اخبار کی رپورٹ کے مطابق سابق وزیراعظم قطر ایئرویز کی پرواز سے لاہور سے روانہ ہوئے اور دوحہ میں مختصر قیام کے بعد ہیتھرو پہنچے۔

اطلاعات ہیں کہ شہباز شریف اپنے بڑے بھائی اور پارٹی سربراہ نواز شریف سے ملنے اور عام انتخابات سے قبل ہونے والی اہم سیاسی پیش رفت پر تبادلہ خیال کرنے کے لیے لندن پہنچے ہیں۔

ایکس (ٹوئٹر) پر شیئر کی گئی ایک پوسٹ میں رہنما مسلم لیگ (ن) مریم اورنگزیب نے تصدیق کی کہ شہباز شریف برطانیہ میں اپنے قیام کے دوران نواز شریف سے ملاقات کریں گے۔

ملاقات میں نواز شریف کی واپسی اور ان کے کیسز کی صورتحال زیر غور آنے کا امکان ہے، علاوہ ازیں ملاقات کے دوران دونوں بھائیوں کی جانب سے نواز شریف کی پاکستان واپسی کی تاریخ طے کرنے کا بھی امکان ہے۔