’ڈسکور‘ فیچر میں صارفین کو کوئی مواد تلاش نہیں کرنا پڑتا بلکہ از خود ہی مواد مین پیج پر نظر آتا ہے۔

مذکورہ فیچر گوگل کے موبائل صارفین کے لیے ابتدائی طور پر 2018 میں پیش کیا گیا تھا، جسے بعد ازاں تمام ممالک تک پھیلایا گیا تھا۔

اس وقت موبائل پر جیسے ہی کوئی صارف گوگل کھولتا ہے تو سرچ انجن کے نیچے مختلف وائرل خبریں، موسم کی صورتحال اور دیگر مواد کے لنکس نظر آتے ہیں جو کہ ’ڈسکور‘ فیچر کا حصہ ہیں۔

اب ایسی ہی خبریں، موسم کا حال اور کاروبار کی صورتحال سے متعلق تازہ ترین خبروں کی اپڈیٹس کو گوگل کی جانب سے سرچ انجن کے فرنٹ پیج پر ڈیسک ٹاپ صارفین کے لیے بھی شیئر کیا جائے گا۔

ٹیکنالوجی ویب سائٹ ’مین پاور یوزر‘ کی رپورٹ کے مطابق ڈیسک ٹاپ پر ’ڈسکور‘ فیچر کو پیش کرنے کے لیے گوگل نے آزمائش شروع کردی اور جلد ہی اسے متعارف کرایا جائے گا۔

رپورٹ کے مطابق ابتدائی طور پر ’ڈسکور‘ فیچر کی آزمائش بھارت میں کی جا رہی ہے جب کہ جلد ہی مذکورہ آزمائشی فیچر تک دیگر ممالک کے محدود صارفین کو بھی دی جائے گی۔

رپورٹ میں گوگل ترجمان کا حوالہ دیتے ہوئے بتایا گیا کہ انٹرنیٹ سرچ انجن کے ترجمان نے تصدیق کی کہ کمپنی ’ڈسکور‘ فیچر کو ڈیسک ٹاپ پر متعارف کرانے کے لیے کام کر رہی ہے۔

مذکورہ فیچر کو پیش کیے جانے کے بعد جیسے ہی ڈیسک ٹاپ صارفین گوگل کھولیں گے، انہیں پہلے ہی پیج پر متعدد وائرل خبریں، موسم کی صورت حال اور کاروباری معلومات نظر آنے لگے گی۔

مذکورہ تبدیلی کو حالیہ عرصے میں گوگل کی جانب سے ڈیسک ٹاپ پر کی جانے والی بڑی تبدیلی قرار دیا جا رہا ہے، تاہم یہ کہنا قبل از وقت ہے کہ مذکورہ فیچر کو کب تک پیش کیا جائے گا۔