سینیئر اداکار عدنان صدیقی نے اپنی پوسٹ میں نوشین مسعود کی تصویر شیئر کرتے ہوئے ان کے انتقال کی تصدیق کی۔

انہوں نے نوشین مسعود کی تعریفیں کرتے ہوئے ان کے ساتھ گزرے وقت کو یادگار قرار دیا اور ساتھ ہی لکھا کہ انہوں نےنہ صرف آن اسکرین بلکہ آف اسکرین بھی اچھا وقت گزارا۔

عدنان صدیقی نے نوشین مسعود کے انتقال پر اظہار افسوس کرتے ہوئے ان کی مغفرت کی دعائیں بھی کیں۔

خیال رہے کہ عدنان صدیقی اور نوشین مسعود نے ’کالونی 1952‘ نامی ڈرامے میں ایک ساتھ کام کیا تھا۔

نوشین مسعود نے پاکستان ٹیلی وژن (پی ٹی وی) پر کام کرنے کے علاوہ دیگر ٹی وی چینلز کے ڈراموں میں بھی اداکاری کے جوہر دکھائے جب کہ انہوں نے متعدد پروگرامات کی میزبانی بھی کی۔

نوشین مسعود نے متعدد پاکستانی گلوکاروں کے گانوں کی ہدایات بھی دیں جب کہ بطور پروڈیوسر بھی انہوں نے خدمات سر انجام دیں۔

نوشین مسعود کی پیدائش صوبہ سندھ کے دارالحکومت کراچی میں ہوئی اور انہوں نے وہیں سے تعلیم حاصل کرنے کے بعد میڈیا انڈسٹری میں کام کیا، انہوں نے ٹیلی وژن کے ساتھ ساتھ نیوز چینلز میں بھی کام کیا۔

قریبی ذرائع کے مطابق نوشین مسعود چند سال سے کینسر میں مبتلا تھیں اور ان کا علاج جاری تھا، تاہم وہ موذی مرض سے زندگی کی بازی ہار گئیں اور 6 دسمبر کو خالق حقیقی سے جاملیں۔