واٹس ایپ نے ستمبر 2023 میں چینلز کو متعارف کرایا تھا اور پاکستانی صارفین کو بھی چینلز کے فیچر تک اکتوبر میں رسائی دی گئی تھی۔

چینل فیچر فیس بک پیج کی طرح کا ایک اکاؤنٹ ہے، جہاں کوئی بھی شخصیت یا ادارہ اپنے مواد یا تشہیر کا مواد واٹس ایپ میسیج کرسکتا ہے۔

مذکورہ فیچر کی سب سے اہم بات یہ ہے کہ چینل کو صارفین کی جانب سے فالو بھی کیا جاسکتا ہے، تاہم صارف کا فون نمبر یا نام چینل چیٹ میں ظاہر نہیں ہوتا۔

نہ ہی کوئی صارف چینل میں میسیج کا ریپلائی کر سکتا ہے، البتہ صارفین کو یہ سہولت دی گئی ہے کہ وہ چینل کے میسیج کو فارورڈ کر سکے گا۔

لیکن اب خبر سامنے آئی ہے کہ واٹس ایپ کے ماہرین چینلز ایڈمن کی جانب سے اپنے چینل میں دوسروں کے فارورڈ میسیجز کو شیئر کرنے کے فیچر پر کام کر رہے ہیں۔

واٹس ایپ کی اپڈیٹس پر نظر رکھنے والی ویب سائٹ ویب ایٹ انفو کے مطابق ماہرین فارورڈ میسیجز کو چینلز میں شیئر کرنے کے فیچر پر کام کر رہے ہیں، جس کے تحت صرف ایڈمن دوسرے چیٹس میں موصول ہونے والے میسیجز کو براہ راست چینلز میں شیئر کر سکیں گے۔

رپورٹ کے مطابق ممکنہ طور پر مذکورہ فیچر کے تحت ایڈمن کو یہ اختیار بھی دیا جائے گا کہ وہ ابتدائی طور پر فارورڈ میسیج کو چینل میں ڈرافٹ کے طور پر محفوظ کرے اور پھر اس کا جائزہ لے کر اسے شیئر کرے۔

رپورٹ میں بتایا گیا کہ ابھی یہ واضح نہیں ہے کہ فارورڈ میسیجز کے فیچر کو کب تک پیش کیا جائے گا، تاہم امکان ہے کہ اسے اگلے 6 ماہ میں پیش کردیا جائے گا۔

خیال رہے کہ واٹس ایپ کے ماہرین چینلز میں صارفین کی جانب سے ریپلائی کرنے کے فیچر کو پیش کرنے پر بھی کام کر رہے ہیں۔

اسی طرح چینلز میں پولز دیے جانے سمیت دوسرے افراد کو ایڈمن بنائے جانے کے فیچر پیش کیے جانے پر کام کیا جا رہا ہے۔