ڈی آئی جی جنوبی سید اسد رضا نے بتایا کہ کراچی کے کینٹ اسٹیشن پر کھڑی عوام ایکسپریس کی کوچ نمبر پانچ کی سیٹ 71-72 سے ایک بیگ میں سے بم برآمد ہوا جبکہ وہاں پر کوئی بھی موجود نہیں تھا۔

یہ ٹرین پشاور سے رات 8 بجکر 20 منٹ پر کراچی کینٹ اسٹیشن پہنچی تھی اور ٹرین کے عملے کو 9بجکر 15 منٹ پر یہ بیگ ملا جس میں ایک بیٹری، تار کے سوئچ اور دیگر مینیکل اشیا موجود تھیں۔

بیگ کو پلیٹ فارم پر محفوظ مقام پر منتقل کر کے بم ڈسپوزل اسکواڈ کو طلب کر لیا گیا جس نے بم کو ناکارہ بنا دیا۔

ڈی آئی جی نے کہا کہ ایسا محسوس ہوتا ہے کہ کوئی جان بوجھ کر وہاں بیگ چھوڑ کر غائب ہو گیا ہے۔

بم کی موجودگی کی خبر پھیلتے ہی اسٹیشن پر خوف و ہراس پھیل گیا اور کسی بھی ناخوشگوار واقعے سے بچنے کے لیے اسٹیشن کو خالی کرا لیا گیا تھا۔