ڈان نیوز کے مطابق اخبار ’سٹی اے ایم‘ لندن میں سب سے زیادہ پڑھے جانے والا اقتصادی اخبار ہے، برطانوی اخبار نے اشاعت میں پاکستان میں سرمایہ کاری کےخصوصی مواقعوں پر روشنی ڈالی ہے، اس میں بتایا گیا کہ پاکستان دنیا کی پانچویں بڑی آبادی ہونے کےساتھ ایک منفرد جیو اسٹریٹجک محل وقوع رکھتا ہے، پاکستان کی 4.8 ٹریلین پاؤنڈ کی معدنی دولت غیرملکی سرمایہ کاروں کوتیزی سے راغب کر رہی ہے۔

اس میں مزید کہا گیا ہے کہ نگران وزیراعظم انوار الحق کاکڑ سرمایہ کاری کا فعال طور پر خیرمقدم کر رہے ہیں، خصوصی سرمایہ کاری کونسل کا آئندہ 5 سالوں میں 48 ارب پاؤنڈ سرمایہ کاری لانےکا ہدف ہے، ریکوڈک پر سونے اور تانبے کے وسیع ذخائر کئی ملکوں کی سرمایہ کاری کے لیے موزوں ہیں، وافر معدنی وسائل میں کوئلہ، نمک، لتھیئم، ریئرارتھ، نکل، یاقوت، کرومائیٹ اور زمرد شامل ہیں۔

اس کے مطابق حکومت پاکستان 2031 تک قابل تجدید توانائی کو دگنا کرنے کے لیے بھی پر عزم ہے، پاکستان کا اسٹریٹجک محل وقوع اسے عالمی گیس کوریڈور کےطور پر بھی مثالی حیثیت مہیا کرتا ہے، غیرملکی سرمایہ کار زراعت میں کارپوریٹ فارمنگ انٹرپرائزز کے 100 فیصد مالک ہوسکتے ہیں، 57 فیصد نوجوان اور سالانہ 25 ہزار آئی ٹی گریجویٹ پاکستان کی عالمی سرمایہ کاری کے لیے انتہائی موزوں ہے۔