کراچی سے صوبائی اسمبلی کے حلقہ پی ایس 105 سے کاغذات نامزدگی جمع کرانے کے بعد میڈیا سے بات کرتے ہوئے سعید غنی کا کہنا تھا کہ پیپلز پارٹی نے کبھی الیکشن سے فرار کی کوشش نہیں کی جبکہ تمام سیاسی جماعتوں کو انتخابات میں حصہ لینے کا موقع ملنا چاہیے۔

انہوں نے کہا کہ کراچی میں مضبوط ترین امیدوار میدان میں لائیں گے، کچھ لوگوں کی خواہش ہوسکتی ہے کہ الیکشن نہ ہوں لیکن ملک کو سیاسی و معاشی بحران سے نکالنے کے لیے انتخابات کا انعقاد ضروری ہے، جبکہ پیپلز پارٹی واحد جماعت ہے جو سرگرمی سے انتخابی مہم چلارہی ہے۔

سعید غنی نے کہا کہ 2018 میں عرفان اللہ مروت کو بدترین شکست ہوئی، ایسے امیدوار جو صرف الیکشن میں نظر آتے ہیں ان کو لوگ پسند نہیں کرتے۔

انہوں نے کہا کہ عرفان اللہ مروت حلقے میں نسلی تعصب پھیلا رہے ہیں، عوام اس سازش کو ناکام بنا دیں گے۔

رہنما پیپلز پارٹی کا مزید کہنا تھا کہ تحریک انصاف نے انتخابات نہیں مذاکرات کروائے، 9 مئی کے واقعات میں ملوث افراد کے خلاف قانونی کارروائی ہونی چاہیے۔