گوگل کی ریسرچ ٹیم نے طویل جدوجہد کے بعد لمیئر (Lumiere) نامی ایک ایسا ٹول تیار کیا ہے، جہاں پر صارفین صرف دو لائنز لکھیں گے اور کچھ ہی سیکنڈز میں انہیں اے آئی ویڈیو تیار کرکے فراہم کرے گا۔

مذکورہ ٹول کے حوالے سے گوگل کی جانب سے ریسرچ پیپر اور ویب سائٹ کو متعارف کرادیا گیاہے، تاہم ابھی اس پر کام نہیں کیا جا سکتا لیکن بتایا گیا کہ مذکورہ ٹول صرف دو لائن کے الفاظ سے ہی ویڈیو بناکر دے سکتا ہے۔

یعنی کوئی بھی شخص اگر مذکورہ ٹول میں لکھے گا کہ انہیں سمندر کنارے گھوڑے پر سیر کرتے لڑکے اور لڑکی کا رومانوی ویڈیو کلپ درکار ہے تو مذکورہ ٹول چند ہی سیکنڈز میں صارف کو سمندر کنارے لڑکے اور لڑکی کی گھڑ سواری کرتے ہوئے رومانوی مناظر کی ویڈیو فراہم کردے گا۔

اسی طرح ٹولز میں ایڈیٹنگ کا آپشن بھی دیا جائے گا، یعنی صارف اگر ویڈیو دیکھنے کے بعد کہے کہ لڑکی کے کپڑوں کا رنگ گلابی اور لڑکے کے کپڑوں کا رنگ سفید ہونا چاہئیے تو ویڈیو از خود چند ہی سیکنڈز میں ایڈٹ ہوجائے گی۔

اسی طرح مذکورہ ٹول کے ذریعے ویڈیو میں بیک گرائونڈز اور تھیمز کے درجنوں آپشنز بھی پیش کیے جائیں گے۔

یہ کہنا قبل از وقت ہے کہ مذکورہ ٹول کو گوگل عوامی استعمال کے لیے کب تک متعارف کرائے گا، تاہم امکان ہے کہ اسے متعارف کرانے میں چند ماہ یا ایک سال کا عرصہ لگ سکتا ہے۔

گوگل سے قبل فیس بک اور ٹک ٹاک سمیت دیگر پلیٹ فارمز نے بھی ایسے ہی ٹولز تیار کرکے انہیں جلد متعارف کرانے کا اعلان کیا تھا، تاہم ابھی تک عام صارفین کے لیے انتہائی کم ٹولز کو متعارف کرایا گیا ہے۔