’ڈان نیوز‘ کے مطابق لاہور کے مختلف علاقوں میں رات کو گرج چمک کے ساتھ بارش ہوئی، فیصل آباد، گجرات، جہلم اور منڈی بہا الدین سمیت مختلف علاقوں میں بادل برسے۔

آزاد کشمیر اور گلگت بلتستان کے مختلف علاقوں میں بارش اور برف باری کی وجہ سے مختلف رابطہ سڑکیں بند ہوگئیں۔

محکمہ موسمیات نے آج بھی اسلام آباد، پنجاب، بالائی خیبر پختونخوا، گلگت بلتستان اور کشمیر میں بارش اور پہاڑوں پر برف باری کی پیش گوئی کی ہے۔

ملکہ کوہسار مری میں برفباری

دوسری جانب ملکہ کوہسار مری میں برفباری کا سلسلہ جاری ہے، پی ڈی ایم اے نے مری اور ملحقہ علاقوں میں سیاحوں کو برفباری میں محتاط رہنے کی ہدایت کردی، 17 میل کے علاقے سے سیاحوں کا مری میں داخلہ بند کردیا گیا۔

ترجمان پی ڈی ایم اے نے بتایا کہ مری اور راولپنڈی انتظامیہ برف باری کے باعث پوری طرح الرٹ اور فیلڈ میں موجود ہے، ایکسپریس ہائی وے سمیت تمام اہم شاہراہوں سے برف ہٹانے کا کام جاری ہے۔

لوکل انتظامیہ کو ہدایت دی گئی کہ سیاحوں کے لیے مناسب انتظامات کریں، ترجمان کا مزید کہنا تھا کہ دیگر علاقوں سے سفر کرنے والوں سے احتیاط برتنے کی درخواست کی گئی ہے، عوام موسم کو مدِنظر رکھتے ہوئے سفر کریں۔