ریسکیو 1122 کے ترجمان رسول خان شریف نے ’ڈان ڈاٹ کام‘ کو ہلاکتوں کی تصدیق کرتے ہوئے کہا کہ دونوں افراد لینڈ سلائیڈنگ کا ملبہ ہٹاتے ہوئے حادثے کا شکار ہوئے۔

ترجمان نے مزید بتایا کہ متاثرہ افراد کو فوری طور پر ملبے سے نکال کر سوات کے ہسپتال منتقل کیا گیا جہاں 17 سالہ امجد علی اور 26 سالہ سید باچا دونوں زخموں کی تاب نہ لاتے ہوئے دم توڑ گئے۔

مقامی اسکول کے استاد محمد صالح نے بتایا کہ کئی مقامات پر سڑک بلاک ہونے کے بعد علاقہ مکینوں نے ڈپٹی کمشنر سے ملبہ ہٹانے کی درخواست کی تھی۔

انہوں نے کہا کہ ضلعی انتظامیہ کی جانب سے کوئی مثبت جواب نہ ملنے پر مقامی لوگوں نے اپنی مدد آپ کے تحت ملبہ ہٹانا شروع کیا جس کے دوران حادثہ ہوگیا۔

واضح رہے کہ خیبر پختونخوا میں حالیہ بارشوں اور لینڈسلائیڈنگ سے ہونے والے حادثات میں اب تک کم از کم 27 افرادجاں بحق جبکہ 38 سے زیادہ افراد زخمی ہو چکے ہیں، اس کے علاوہ 129 گھروں کو جزوی جبکہ 33 گھروں کو مکمل نقصان پہنچا ہے۔