حال ہی میں عاشر وجاہت اور نائل وجاہت نے وائس آف امریکا (وی او او) اردو سروس کو انٹرویو دیا، جس میں دونوں نے اپنے گانے ’صدقے‘ پر کھل کر بات کی۔

ایک سوال کے جواب میں عاشر وجاہت نے کہا کہ انہیں یہ اندازا نہیں تھا کہ ان کا گانا اتنا کامیاب جائے گا، تاہم انہیں امید تھی کہ ان کی محنت رائیگاں نہیں جائے گی۔

گانے میں گلوکارہ نہال نسیم کو شامل کرنے کے حوالے سے پوچھے گئے سوال پر عاشر وجاہت کا کہنا تھا کہ جب سے انہوں نے گانا بنانے کا سوچا تھا تب سے ان کی ذہن میں گلوکارہ کا نام تھا۔

انہوں نے نہال نسیم کی تعریفیں کرتے ہوئے کہا کہ ان کے خیال میں وہ موجودہ دور کی ابھرتی ہوئی تمام گلوکاراؤں سے بہتر ہیں اور انہوں نے ان کی توقعات سے بڑھ کر کام کیا۔

ایک سوال کے جواب میں نائل وجاہت کا کہنا تھا کہ ’صدقے‘ کی شوٹنگ کراچی آرٹس کونسل میں کی گئی اور وہاں چار سیٹ بنائے گئے تھے۔

دونوں بھائیوں نے کہا کہ انہیں اپنے گانے کے مشہور ہونے پر خوشی ہے اور سب سے بڑھ کر اس بات کی خوشی ہے کہ گانے کی ویڈیو کو بھارتی، پاکستانی اور دیگر ممالک کے اداکار سوشل میڈیا پر شیئر کر رہے ہیں۔

عاشر وجاہت کا کہنا تھا کہ ’صدقے‘ کی ویڈیو کو اب تک آیوشمن کھرانہ اور ثانیہ ملہوترا سمیت دیگر بھارتی اداکار سوشل میڈیا پر شیئر کر چکے ہیں۔ دونوں بھائیوں نے خواہش ظاہر کی کہ شاہ رخ خان ان کے گانے کو سوشل میڈیا پر شیئر کردے تو ان کے مزہ ہوجائیں گے، کیوں کہ دونوں بھائی ان کے مداح ہیں۔

عاشر وجاہت نے بتایا کہ ’صدقے‘ گانے کی تیاری میں 60 فیصد آئیڈیاز ان کے چھوٹے بھائی نائل کے تھے اور وہ ان سے محض دو سال چھوٹے ہیں۔

خیال رہے کہ دونوں بھائیوں اور نہال نسیم کا گانا ’صدقے‘ ایک ماہ قبل ہی ریلیز ہوا تھا اور اب تک اسے یوٹیوب پر 60 لاکھ بار کے قریب دیکھا جا چکا ہے اور گانا پاکستان اور بھارت سمیت دیگر ممالک میں ٹرینڈ کر رہا ہے۔