ملزمان کی درخواست ضمانت پر اینٹی کرپشن عدالت کے جج صفدر حسین بھٹی نے محفوظ فیصلہ سنایا۔

اس موقع پر قیصرہ الہی، راسخ الہی اور زارا الہی سمیت دیگر ملزمان عدالت میں پیش ہوئے۔

اینٹی کرپشن نے تفتیش میں تمام ملزمان کو قصور وار قرار دیا اور ضمانتیں خارج کرنے کی استدعا کی۔

اینٹی کرپشن عدالت کے جج صفدر حسین بھٹی نے وکلا کے دلائل کے بعد فیصلہ سناتے ہوئے پرویز الہی کی اہلیہ قیصرہ الہی، راسخ الہی اور زارا الہی کی عبوری ضمانتیں 5، 5 لاکھ روپے کے مچلکوں کے عوض کنفرم کیں۔

واضح رہے کہ ضمانتیں کنفرم یا ضمانت میں توثیق کا مطلب یہ ہوتا ہے کہ اس کیس میں اب مستقل بنیادوں پر ان کی ضمانت ہو چکی ہے اور انہیں اب اس کیس میں گرفتار نہیں کیا جاسکتا، تاہم پراسیکیوشن اس فیصلے کو چیلنج کر سکتی ہے، جس کے بعد عدالت چاہے تو ضمانت مسترد کرسکتی ہے۔

یاد رہے کہ 16 مارچ کو لاہور کی اینٹی کرپشن عدالت نے رنگ روڑ منصوبے کی توسیع کی منظوری میں مبینہ بدعنوانی کے مقدمہ میں سابق وزیراعلیٰ پنجاب چوہدری پرویز الہی کی اہلیہ قیصرہ الہی سمیت دیگر کی ضمانت میں 22 مارچ تک توسیع کردی تھی۔