گزشتہ روز (23 مارچ) یوم پاکستان کے موقع پر ایوان صدر میں ملک کے لیے نمایاں خدمات انجام دینے والوں کو اعلیٰ ترین سول اعزازات دینے کی تقریب منعقد ہوئی۔

اس دوران فن اور آرٹ کے شعبے میں نمایاں خدمات ادا کرنا پر متعدد نامور شخصیات کو بھی ایوارڈ سے نوازا گیا۔

سوشل میڈیا رپورٹس کے مطابق لاہور میں حالیہ اچھرا واقعے کے دوران مشتعل ہجوم سے خاتون کو بچانے میں اہم کردار ادا کرنے والے دکاندار جانسن طارق کو بھی یوم پاکستان کی پریڈ میں اعزاز سے نوازا گیا۔

سجل علی-تمغہ امتیاز

اداکارہ سجل علی کو تمغہ امتیاز سے نوازا گیا، انہوں نے ایوارڈ وصول کرنے والی ویڈیو شئیر کرتے ہوئے لکھا کہ وہ بہت خوشی محسوس کررہی ہیں اور اس کے لیے وہ اپنی مرحوم والدہ سمیت مداحوں کی شکرگزر ہیں۔

سجل علی کو تمغہ امتیاز نوازے جانے پر ماہرہ خان، حریم فاروق، شہزاد رائے، وہاج علی، مایا خان اور دیگر کئی ساتھی اداکاروں نے انہیں مبارک باد دی۔

عدنان صدیقی-رائیڈ آف پرفارمنس ایوارڈ

سینئر اداکار عدنان صدیقی کو فن کے شعبے میں نمایاں خدمات انجام دینے پر پرائیڈ آف پرفارمنس ایوارڈ سے نوازا گیا۔

انسٹاگرام پر ویڈیو شئیر کرتے ہوئے انہوں نےلکھا کہ ’شکریہ ادا کرنے کے لیے نوٹ لکھتے ہوئے اس وقت میں بہت جذباتی ہوں، پرائیڈ آف پرفارمنس ایوارڈ حاصل کرنے کا سفر کسی غیر معمولی سے کم نہیں تھا۔‘

انہوں نے مزید کہا کہ ’یہ ایوارڈ اتنا ہی آپ کا ہے جتنا میرا ہے۔‘

جگن کاظم -تمغہ امتیاز

ٹی وی میزبان جگن کاظم کو ملک کی سب سے بڑی رمضان ٹرانسمیشن کی میزبانی کرنے پر تمغہ امتیاز سے نوازا گیا۔

انہوں نے انسٹاگرام پر لکھا کہ ’مجھے پی ٹی وی میں کام کرنے پر بہت فخر ہے، اور مجھے میڈیا میں اپنے کام کے لیے پہچانے جانے پر اور بھی زیادہ فخر ہے، مجھے پاکستانی ہونے پر بھی بہت فخر ہے اور آج مجھے اپنے ملک کی پہچان ہونے پر سب سے زیادہ فخر ہے۔‘

بلال لاشاری -ستارہ امتیاز

فلمساز بلال لاشاری، جنہیں فلم ’دی لیجنڈ آف مولا جٹ‘ سے شہرت ملی، کو تیسرا اعلیٰ ترین اعزاز ستارہ امتیاز سے نوازا گیا۔

واسع چوہدری - تمغہ امتیاز

نامور میزبان، اداکار اور رائٹر واسع چوہدری کو تمغہ امتیاز سے نوازا گیا۔

راحت فتح علی خان -ہلال امتیاز

صدر آصف علی زرداری نے استاد راحت فتح علی خان کو پاکستانی اور جنوبی ایشیائی موسیقی کی صنعت کے لیے خدمات پر پاکستان کے دوسرے اعلیٰ ترین سول ایوارڈ ’ہلال امتیاز‘ سے نوازا۔

فنون لطیفہ، قوالی اور گائیکی کے شعبوں میں ان کی خدمات اور قوالی اور جدید موسیقی کے ذریعے پاکستانی فنون کو عالمی سطح پر لے جانے پر انہیں یہ ایوارڈ دیا گیا۔

راحت فتح علی خان نے کہا کہ میں شکر گزار ہوں کہ ہلال امتیاز اور ستارہ امتیاز ایوارڈز سے نوازا گیا، میں اپنے خاندان، دوستوں، اور مداحوں کا شکر گزار ہوں جن کی وجہ سے میں آج تک یہاں پہنچا۔’

ان کا کہنا تھا کہ یہ ان کے لیے بڑے اعزاز کی بات ہے کہ انہیں پہلے 2018 میں ستارہ امتیاز اور اب 2024 میں ہلال امتیاز سے نوازا گیا، میں پوری کوشش کروں گا کہ پاکستان کا اچھا امیج دنیا کے سامنے لاؤں۔

عنایت حسین بھٹی-پرائیڈ آف پرفارمنس

اداکار علی عباس نے انسٹاگرام پر لکھا کہ ان کے دادا فلمساز، گائیک اور اداکاز مرحوم عنایت حسین بھٹی کو ان کے وفاقت کے 25 سال بعد بالآخر پرائیڈ آف پرفارمنس ایوارڈ سے نوازا گیا۔

عنایت حسین بھٹی کا ایوارڈ علی عباس نے وصول کیا۔

اداکار نے مزید لکھا کہ ’میں جانتا ہوں کہ آج آسمان سے مجھے مسکرا کر دیکھ رہے ہوں گے، میں آپ وعدہ کرتا ہوں کہ ابھی منزلیں اور بھی ہیں، انشاء اللہ‘