مسترد کی گئی درخواست مقتول عبدالرزاق شر ایڈووکیٹ کی جانب سے دائر کی گئی تھی تاہم ان کے قتل کے بعد درخواست کی پیروی امان اللہ کنرانی ایڈووکیٹ نے کی۔

بلوچستان ہائی کورٹ کے چیف جسٹس جسٹس ہاشم کاکڑ اور جسٹس شوکت رخشانی پر مشتمل 2 رکنی بینچ نے سماعت کی، کیس کی پیروی امان اللہ کنرانی ایڈووکیٹ نے کی جب کہ سماعت کے دوران صدر انصاف لائرز فورم اقبال کاسی بھی عدالت میں پیش ہوئے۔

سماعت کے بعد صدر انصاف لائرز فورم سید اقبال شاہ نے میڈیا کو بتایا کہ بانی پی ٹی آئی اور سابق وزیراعظم عمران کے خلاف آرٹیکل 6 کی کارروائی کی درخواست مئی 2023 میں دائر کی گئی تھی۔

درخواست میں قومی اسمبلی کو خلاف آئین تحلیل کرنے پر آرٹیکل 6 کے تحت کارروائی شروع کرنے کی استدعا کی گئی تھی۔

ان کا کہنا تھا کہ ہم نے استدعا کی تھی کہ یہ بلوچستان ہائی کورٹ کے دائرہ اختیار میں نہیں اتا عدالت نے ہماری استدعا منظور کرتے ہوئے درخواست مسترد کردی۔

سپریم کورٹ کے ایک سینئر وکیل عبدالرزاق شر جنہیں بعد میں قتل کردیا گیا تھا نے استدعا کی تھی کہ عمران خان نے صدر کو قومی اسمبلی تحلیل کرنے کا مشورہ دے کر آئین کی خلاف ورزی کی ہے، اس لیے ان کے خلاف آرٹیکل 6 کے تحت مقدمہ چلایا جائے۔