پی بی بی کی جانب سے پریس ریلیز کے مطابق 25-2024 کا سیزن قومی کرکٹ ٹیم کے لیے کافی مصروف ثابت ہوگا، سیزن کے دوران نہ صرف بنگلا دیش، انگلینڈ اور ویسٹ انڈیز کی ٹیمیں ٹیسٹ سیریز کے لیے پاکستان آئیں گی بلکہ 21 سال بعد جنوبی افریقہ اور نیوزی لینڈ کی سہ فریقی سیریز بھی پاکستان میں کھیلی جائے گی۔

پی سی بی کے مطابق قومی ٹیم رواں سال 21 اگست سے 3 ستمبر تک بنگلا دیش کے خلاف راولپنڈی اور کراچی میں 2 ٹیسٹ میچز کھیلے گی۔

بیان میں بتایا گیا کہ اسی برس اکتوبر میں انگلینڈ کی کرکٹ ٹیم 3 ٹیسٹ میچز کھیلنےکے لیے پاکستان کا دورہ کرے گی، انگلش ٹیم 7 سے 28 اکتوبر تک ملتان، کراچی اور راولپنڈی میں طویل دورانیے کی کرکٹ کھیلے گی۔

کرکٹ بورڈ نے بتایا کہ جنوری 2025 میں ویسٹ انڈیز کی ٹیم 2 ٹیسٹ کھیلنے کے لیے پاکستان آئے گی، ویسٹ انڈین ٹیم 16 سے 28 جنوری تک کراچی اور ملتان میں ٹیسٹ میچز کے لیے میدان میں اترے گی۔

پریس ریلیز میں بتایا گیا کہ فروری 2025 میں قومی ٹیم جنوبی افریقہ اور نیوزی لینڈ کے خلاف سہ فریقی ون ڈے سیریز کھیلے گی، سیریز کے میچز 8 سے 14 فروری تک ملتان میں کھیلے جائیں گے۔