ڈان نیوز کے مطابق وزیر اعظم نے ایران کے نو منتخب صدر مسعود پیزشکیان سے ٹیلی فون پر بات چیت کی اور صدارتی انتخابات میں ان کی کامیابی پر انہیں مبارکباد پیش کی۔

وزیراعظم نے ایران کے سپریم لیڈر آیت اللہ خامنہ ای کے لیے بھی نیک خواہشات کا اظہار کیا اور جمہوری عمل کے ذریعے نئے صدر کے انتخاب پر انہیں اور ایران کے عوام کو مبارکباد پیش کی۔

وزیراعظم نے ایران کے نومنتخب صدر سے گفتگو میں کہا کہ پاکستان، ایران کے ساتھ تعلقات کو مزید مستحکم کرنے کا خواہاں ہے جبکہ تجارت توانائی اور علاقائی سلامتی سمیت مختلف شعبوں میں دوطرفہ تعاون کو بڑھانے کے لیے ساتھ مل کر کام کرنے کے منتظر ہیں۔

نومنتخب صدر مسعود پیزشکیان نے دونوں ممالک کے درمیان برادرانہ تعلقات کو مزید مضبوط کرنے کی خواہش کا اظہار کیا۔

دونوں رہنماؤں نے علاقائی امور پر بھی تبادلہ خیال کیا اور قریبی رابطہ اور مشاورت جاری رکھنے پر اتفاق کیا۔