غیر ملکی خبررساں ادارے ’اے ایف پی‘ کی رپورٹ کے مطابق گزشتہ روز پنسلوینیا میں منعقد ریلی کے دوران قاتلانہ حملے میں بچ جانے والے سابق ڈونلڈ ٹرمپ امریکی ریاست وسکونسن کے شہر ملواکی پہنچ گئے ہیں۔

ریپبلکنز 15 سے 18 جولائی تک ملواکی میں ہونے والے ریپبلکن نیشنل کنونشن میں ڈونلڈ ٹرمپ کو پارٹی کے باضابطہ صدارتی امیدوار کے طور پر نامزد کرنے کے لیے تیار ہیں۔

حکام کے مطابق اس کنونشن میں تقریباً 50 ہزار افراد کی شرکت متوقع ہے، تاہم گزشتہ روز ٹرمپ پر حملے کے بعد اس تعداد میں سیکیورٹی وجوہات کی وجہ سے کمی آسکتی ہے، لیکن کنونشن کے مقام پر سیکیورٹی کے انتہائی سخت انتظامات کیے گئے ہیں۔

حکام کا کہنا تھا کہ کنونشن میں 2400 ریپبلکن نمائندے شرکت کریں گے، جو باضابطہ طور پر پارٹی کے صدارتی امیدوار اور نائب صدارتی امیدوار کی نامزدگی کا اعلان کریں گے، علاوہ ازیں، دنیا بھر سے ہزاروں صحافی اس کنونشن کی کوریج کے لیے موجود ہوں گے۔

یاد رہے کہ ڈونلڈ ٹرمپ نے اب تک اپنے نائب سے متعلق کوئی اعلان نہیں کیا، تاہم اس کنونشن کے بعد ریپلکن کے نائب صدارتی امیدوار کا نام بھی سامنے آجائے گا۔

سابق امریکی صدر نے اپنے بیان میں واضح کیا کہ انہوں نے اپنا شیڈول تبدیل کرنے پر غور کیا ہے لیکن وہ انتخابی مہم میں خلل ڈالنے کی کوششوں کو کامیاب نہیں ہونے دیں گے، انہوں نے کہا کہ ہمیں اب پہلے سے کہیں زیادہ متحد ہونے کی ضرورت ہے۔

واضح رہے کہ گزشتہ روز ڈونلڈ ٹرمپ پنسلوینیا میں منعقد ریلی کے شرکا سے خطاب کیلئے اسٹیج پر موجود تھے کہ اس دوران اچانک فائرنگ کا واقعہ پیش آیا اور گولی سابق امریکی صدر کے کان کو چھوتی ہوئی نکل گئی تاہم وہ اس حملے میں محفوظ رہے۔

سیکریٹ سروس ایجنٹس نے حملہ آور کو جوابی کارروائی میں ہلاک کردیا، فائرنگ کے نتیجے میں ریلی میں موجود ایک شخص ہلاک اور دو زخمی ہوئے تھے، جب کہ سیکیورٹی اہلکار ٹرمپ کو اپنے حصار میں لے کر موقع سے روانہ ہوگئے، واقعہ کے بعد ریلی فوری طور پر ختم کردی گئی تھی۔

فیڈرل بیورو آف انویسٹیگیشن (ایف بی آئی) نے سابق امریکی صدر ڈونلڈ ٹرمپ کے انتخابی مہم کے دوران قتل کرنے کی کوشش کرنے والے مشتبہ شخص کی شناخت 20 سالہ تھامس میتھیو کروکس کے نام سے کی ہے۔