دن کا آغاز وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی سے ہوا، اس موقع پر پاکستان کی سلامتی، ترقی اور خوشحالی کے لیے دعائیں کی گئیں۔

نماز فجر کے بعد مساجد میں ملک کے امن و سلامتی اور خوشحالی کے لیے خصوصی دعائیں مانگی گئیں۔

جشن آزادی کی مناسبت سے سرکاری اور نجی عمارتوں کے ساتھ ساتھ گلیوں، بازاروں اور عوامی مقامات کو سربز پرچموں اور برقی قمقموں سے روشن کیا گیا جبکہ قومی پرچم، پینٹنگز، بانیان پاکستان کے پورٹریٹس، پوسٹرز اور بینرز بھی جگہ جگہ نظر آئے۔

دوسری جانب، کراچی میں مزار قائد پر گارڈز کی تبدیلی کی پروقار تقریب منعقد ہوئی، پاکستان نیول اکیڈمی کےکیڈٹس نےمزار قائد پر اعزازی گارڈز کے فرائض سنبھال لیے۔

کمانڈنٹ پاکستان نیول اکیڈمی کے کموڈور محمد خالد تقریب کے مہمان خصوصی تھے، پریڈ کمانڈر کے فرائض لیفٹیننٹ کمانڈر احمد حسن تمغہ بسالت نے سرانجام دیے۔

ایک دستہ پاک بحریہ کے سیلرز، دوسرا پاکستان نیول اکیڈمی کے کیڈٹس پر مشتمل ہے، پاکستان نیول اکیڈمی کے کیڈٹس ہر سال 14اگست کو یہ ذمہ داری سنبھالتے ہیں۔

یوم آزادی کے سلسلے میں بلوچستان اسمبلی کے سبزہ زار میں پرچم کشائی کی تقریب سے خطاب کرتے ہوئے مہمان خصوصی نائب وزیراعظم و وزیر خارجہ اسحٰق ڈار کا کہنا تھا کہ مل کرعہد کریں ہم نےکسی سازش کا حصہ نہیں بننا، ہمیں مل کر پاکستان کو آگے لے جانا ہے۔

نائب وزیراعظم اسحٰق ڈار کا کہنا تھا کہ ناراضگی کے نام پر تشدد کی اجازت نہیں دی جاسکتی۔

ادھر، وزیر اعلیٰ پنجاب مریم نواز شریف نے مزار اقبال پر حاضری دی اور پھولوں کی چادر چڑھائی، اس کے علاوہ انہوں نے مزار اقبالؒ پر فاتحہ خوانی کی۔

وزیر اعلیٰ پنجاب نے ملک کی سالمیت، ترقی و خوشحالی، استحکام کے لیے دعا کی، انہوں نے شاعر مشرق علامہ محمد اقبالؒ کو شاندار الفاظ میں خراج عقیدت پیش کیا، اس کے علاوہ مریم نواز شریف نے شاہی قلعہ کے عالمگیری دروازے پر پرچم کشائی کی۔

وزیر اعلیٰ پنجاب مریم نواز کا یوم آزادی کی تقریب سے خطاب کرتے ہوئے کہا کہ ہمارا ملک ہمیشہ شاد اور آباد رہے، ہم آزاد ملک میں سانس لے رہے ہیں یہ بڑی نعمت ہے۔

ان کا کہنا تھا کہ کل میں میاں چنوں ارشد ندیم کے گھر گئی، کئی دہائیوں کے بعد ہمیں گولڈ میڈل ملا، ہمارے نوجوانوں اور قوم میں بہت ٹیلنٹ ہے۔

کور کمانڈر کراچی لیفٹیننٹ جنرل بابر افتخار کی مزار قائد پر حاضری

اس موقع پر کور کمانڈر کراچی لیفٹیننٹ جنرل بابر افتخار نے مزار قائد پر حاضری دی، پھول چڑھائے اور فاتحہ خوانی کی۔

انہوں نے مہمانوں کی کتاب میں تاثرات بھی قلم بند کیے۔